7-8 ва 10-июндиз яргъалди къати марфар къунин нетижада Ахцегь вацIун дереда республикадин метлеб авай рекьин 16-километрдин мензилда дагъ ацахьуникди Хинер, Фияр ва Гутумар хуьрериз хъфизвай рехъ михьиз къайдадикай хкатна. Къейд ийин хьи, дагълух и хуьрера 4 агъзурдалай артух агьалияр яшамиш жезва, анра халкьдин яшайишдин метлебдин 4 объект ава.
2022-йисан январдилай Ахцегь районда авай рекьерин къуллугъдин кархана — ДЭП 4 — агал хьун себеб яз, муниципалитетда рекьер цIийикIа туькIуьр хъувунин, къати марфар къвайила, селлерикайни кьвалар ацахьунрикай михьи авунин, рекьер къайдадиз хкунин кIвалахар кьиле тухуз жезвач. Бязи дуьшуьшра виликдай и карханади ийизвай хейлин крар инсанри чпин къуватралди бегьемарзава.
Алай вахтунда Самур вацIа яд гзаф хьуникди Ахцегьа “Самурский” куьчедин (виликан нисияр хкуддай карханадин патавай) къерехризни тади гузва. Пешекаррин гьисабунралди, ана, энгел тавуна, габион къайдадин бандар ягъунин чарасузвал ава. И месэладин гьакъиндай Ахцегь райондин администрацияди РД-дин гьукумат ва “Дагестанавтодор” ГКУ хабардар авунва, абурун патай куьмек вилив хуьзва.
Дашдемир Шерифалиев
