14 июнь — Виридуьньядин Донордин (хер алайбур, азарлуяр патал вичин иви гузвай кас) югъ я. Бязи вахтара и важиблу месэладиз инсанри са артух фикир гун тийизвай хьиз жеда. Гьар йикъан дердийринни къайгъуйрин суьгьбетрик кваз чаз адакай тIимил ван къведа. ГьакI тушни? Иви гун (донорство) лагьайтIа, гьам донор патал, гьам ивидин игьтияж авай кас (реципиент) патални хийирлу кар я. Кьилинди, донорди маса касдин уьмуьр къутармишзава.
Малум тирвал, уьмуьрда са бедбахтвал кьилел атана, хирер-кьацIар хьайи ксар, аял хадайла, иви гзаф хкатай дишегьлияр, агъур операцияр кьилиз акъудай, онкологиядикди начагъ азарлуяр патал маса касдин иви герек жезва. Ихьтин дуьшуьшра донордин ивиди инсандин уьмуьр къутармишзава. Иви гузвайдаз вичин сагъламвилиз зарар хьунихъай кичIе хьана кIандач. Къарши яз, мукьвал-мукьвал иви гузвай касдин сагъламвал патал и кар анжах хийирлу я. ГьикI хьи, сагъ инсандин бедендикай иви хкудуни (гуни) цIийи иви арадал гъуниз, идани инсандин бедендин гьар са клетка цIийи хьуниз таъсирзава.
ИкI, иви арадал гъизвай къурулушди хъсандиз кIвалахиз башламишайла, вири бедендин гьал хъсан жезва. Иви гуни рикIинни дамаррин, аутоиммунный азаррин вилик пад кьуниз, чIулав лекьин ва маса органрин кIвалах хъсанаруниз куьмекзава.
Камилла Мегьтиханова,
ДГУ-дин филфакдин
журналистикадин отделенидин студентка
