4-июндиз Кьурагь райондин КьепIиррин хуьре азаддаказ кьуршахар кьунай жаванрин арада, залан атлетикадай машгьур ва къуватлу спортсмен Фикрет Асланован экуь къаматдиз бахшна, кьиле тухвай республикадин турнирдин тешкилатчияр райадминистрациядин физический культурадин, спортдин ва жегьилрин крарин рекьяй отдел, КьепIиррин хуьруьн администрация, мергьяматлувилин “Леки” ва “Абад КьепIир” фондар , Аслановрин хизан тир. Къейд авун лазим я хьи, ам вини дережада аваз кьиле фена, вири мугьманар ва аялар йикъан кьиляй-кьилиз кфетлу тIуьнралди, лазим вири къулайвилералди таъминарнавай. Къведай йисуз юбилейдинди тир 5-турнир мадни гегьеншдиз кьиле тухудайвал я.
Турнирда Дагъустандин жуьреба-жуьре районрайни шегьеррай тир хкянавай 15 командадик кваз 220-дав агакьна спортсменри иштиракна, заланвилин 16 категориядай чпин устадвал къалурна. Акъажунрин кьилин судья кьуршахар кьунай спортдин международный классдин категориядин судья Муъмин Гъаниев тир. Турнирдин багьа мугьманрин арада машгьур чемпионарни жуьреба-жуьре чемпионатрин ва турниррин гъалибчияр авай. Ам ачухуниз талукьарнавай шадвилин мярекатдал Кьурагь райондин кьил Замир Азизов, Фикрет Асланован хва Эльмар Асланов ва Дагъустандин жегьилрин крарин рекьяй министрдин куьмекчи Фарман Меликов ва масабур рахана. Абуру Фикрет Мегьамедовичан уьмуьрдин рекьикай ва спортдин агалкьунрикай суьгьбетна.
Къизгъиндаказ кьиле фейи акъажунрин нетижада 1-чкадиз ва Кубокдиз Кьурагь райондин хкянавай команда лайихлу хьана. Санлай къачурла, турнирда гъалибвал къазанмишай 64 спортсменни медалар, грамотаяр, кубокар, пулдин ва спортдал машгъул хьун патал лазим пишкешар гуналди къейдна. Турнирдин тешкилатчийри тафаватлу хьайи спортсменриз, тренерриз ва мугьманриз рикIел аламукьдай пишкешар, везифаяр вини дережада аваз кьилиз акъудай судьяйрин коллегиядизни пулдин пишкешар гана.
Къейд. Ф.Асланов 1944-йисан 4-апрелдиз Кьурагьа муаллимдин гзаф аялар авай хизанда дидедиз хьана. Фикретан бубади райцентрада а чIавуз жавабдар къуллугъар кьилиз акъудзавай. Кьурагьа, КьепIирдал мектебра кIелай жегьил 1961-йисуз Буйнакскдин медучилищедиз гьахьзава. Са йисалай ам шегьердин спортшколада аялриз вердишвилер гунив эгечIзава. Гьа ина ам Дагъустандин машгьур спортсмен Сали Сулейманахъ (Мамма Магьтулаев) галаз таниш жезва. И танишвили жегьилдин патай спортдихъ авай кIанивал дегишарна, залан атлетикадални рикIивай машгъул жез башламишна. Гьайбатлу къуват авай Фикретавай лап еке заланвал авай шейэрни регьятдаказ хкажиз жедай. Спортдал рикIивай ашукь хьанвай жегьил 1965-йисуз ДГПИ-дин (гилан ДГПУ) физвоспитанидин факультетдиз гьахьзава. 1969-йисуз, анаг акьалтIарна, хайи хуьруьз хтайла, мектебда физкультурадин тарсар, азаддаказ кьуршахар кьунай секцияда аялриз вердишвилер гана. Пуд йисуз (1977-1980-йисара) КьепIиррин юкьван школада директорвилин къуллугъни кьилиз акъудна. Гуьгъуьнлай КьепIиррин хуьруьн советдин, халкьдин контролдин комитетдин, райподин председателвилени зегьмет чIугуна.
«Лезги газет»
