Чи ватанэгьлияр — гьар сана
Эгер инсан зегьметдин къадир чидайди яз хьайитIа, ада вичин кьил, гьина хьайитIани, лайихлудаказ хуьда. Халкьдин мисалда мадни хъсандиз лагьанва: “Зегьметди инсандал баркалла гъида”. Кар кьетIдай алакьунарни, гьевесни алава хъхьайла, вилик эцигай вири макьсадрив агакьда. Ингье и жигьетдай алай вахтунда Туьркиядин Стамбул шегьерда яшамиш жезвай ва ана кIвалахзавай Фарид Музафеддинан хва Велибегов хъсан чешне я.
Фарид Велибегов 1979-йисан 11-июндиз Бакуда дидедиз хьана. Адан ери-бине КцIар райондин ТIагьиржалрин хуьряй я. 1986-1996-йисара ада Бакудин 153-нумрадин мектебда кIелна, 2000-йисуз Бакудин гьукуматдин экономикадин факультет куьтягьна.
2002-йисалай 2014-йисал кьван ам Санкт-Петербургда яшамиш хьана ва эцигунрин хиле зегьмет чIугуна. 2014-йисалай Фарид хизанни галаз Туьркиядин Стамбулда яшамиш жезва. Ина ам, вичин “FNZ Group ITD” тешкилат арадал гъана, юзуриз тежедай мал-мулкунихъ ва метягьар маса уьлквейриз акъудунихъ галаз алакъалу крарал машгъул я. Адан хизанда пуд веледдиз тербия гузва.
Фарида ихтилатзавайвал, ам Стамбулдихъ галаз хъсандиз вердиш хьанва. Ада вич шегьерда чаради хьиз гьиссзавач. Адан гафаралди, Туьркияда Кавказдай тир гзаф инсанар яшамиш жезва.
“Чна Кавказдин милли центрайрихъ галаз хъсан алакъаяр хуьзва. Ингье и йикъара 10 кас кьван кIватI хьана, таниш хьана. Адет яз, чун Бурса шегьердиз физва, гьана милли центр тешкилнава. Лезгияр ина пара ава ва жуьреба-жуьре хилера кIвалахарзава. Кьилди къачуртIа, чи ватанэгьлийри ИТ-технологиядин, медицинадин, государстводин идарайрин хилера зегьмет чIугвазва. Гележегда чаз Стамбулда кьилди лезгийрин милли центр арадал гъидай къаст ава”, — лугьузва Фарида. Къуй абурун мурадар кьилиз акъатрай!
Къейд ийиз кIанзава, кьисметди Стамбулдиз акъуднавай Фарид интернетда кардик квай лезги кIватIалра активнидаказ иштиракзавай, милли медениятдиз майилвалзавай ватанперес я.
К.Ферзалиев
