Алатай гьафтеда Калмыкиядин меркезда азаддаказ кьуршахар кьунай Россиядин кIвенкIвечивал патал 16 йисал къведалди яшда авай жаванрин арада акъажунар кьиле фена. Ана чи уьлкведин 45 субъектдай тир 500-лай виниз спортсменри иштиракна.
Акъажунра Москвадин командадик кваз алакьунар къалурайбурун арада вичин ери-бине Белиждай тир, тренер Вагиф Къазиеван гъилик устадвал хкажзавай Агъаширин Агъашириновни авай. ИкI, 38-кг-дал къведалди заланвал авай спортсменрин арада сифтегьан 4 бягьсина (абур 6:0, 10:0, 3:0 ва 4:0 гьисабралди, кьвед — вахт амаз акьалтIарна) инанмишвилелди гъалибвал къазанмишна. Ярумчух финалда Агъаширин Агъаширинова вичин къуватар Чечнядай тир Амир Кавлаевахъ галаз ахтармишна, бягьс 6:2 гьисабдалди акьалтIна. Финалда ам Калмыкиядай тир Арсланг Живлеевахъ галаз “гуьруьшмиш хьана”, 4:2 гьисабдалди чи ватанэгьли гъалиб хьана.
Им А.Агъаширинован сифтегьан гъалибвал туш, идалай вилик ада республикадин дережада аваз кьиле фейи акъажунра са шумудра кIвенкIвечи чкаяр кьуна. Чи мурад адахъ гьам спортда, гьамни кIелунра еке агалкьунар хьун я.
Чи мухбир
