Дербентда шегьердин депутатрин собранидин цIийи председатель хкяна. Мукьвара Дербентдин депутатрин собранидин заседание кьиле фена. Адан кIвалахда шегьердин кьил Рустамбег Пирмегьамедова, РД-дин Халкьдин Собранидин депутатар тир Велиюла Фаталиевани Тельман Рагьимова, жуьреба-жуьре идарайрин векилри иштиракна.
Мярекатдал гьялай кьилин месэла шегьердин депутатрин собранидин председатель хкягъунихъ галаз алакъалу тир. И къуллугъ патал чкадин депутатрин арадай пуд касдин — “Единая Россия” партиядин патай — Гьасан Мирзоеван, КПРФ-дин патай — Айваз Алиханован ва “Справедливая Россия — Патриоты — За правду” партиядин патай Исмаил Шекералиеван кандидатураяр къалурнавай.
Ачухдиз сесер гунин нетижада депутатри рейсадвилелди Дербент шегьердин депутатрин собранидин председателвиле Гьасан Мирзоев ва адан заместителвиле Даир Эмиргьамзаев хкяна.
Заседанидал гьакIни РД-дин “Дербент шегьер” ГО-дин уставдик дегишвилерни алаваяр кухтуниз, 2021-йисан бюджет кьилиз акъудуниз талукь месэлаярни веревирдна.
Мярекатдин сергьятра аваз депутатри “Фермерская” куьчедиз, къуллугъдин везифаяр тамамардайла телеф хьайи, “Жуьрэтлувиляй” ордендин сагьиб Назим Шамирзаевич Къазиагьмедован тIвар гудай къарар кьабулна.
Къагьриман Ибрагьимов
