Россиядин Федерациядин илимдин ва высший образованидин министерстводин информация агакьарунин ва савадлу авунин кIвалах гуьнгуьна тунин Департаментди мектебар акьалтIарнавай жегьилриз “Вуздик онлайн-къайдада экечIун” къуллугъдин (суперсервис) мумкинвилерикай хабар гузва.
“Вуздик онлайн-къайдада экечIун” къуллугъдин куьмекдалди выпускникривай Россиядин мулкунал алай государстводин ва муниципальный вири вузриз ва абурун филиалриз документар яргъал мензилда аваз рекье тваз ва абуруз талукь делилар датIана гуьзчивилик кваз хуьз жезва.
Алай йисуз суперсервисдин куьмекдалди абитуриентрилай арзаяр бакалавриатдин ва магистратурадин программайрай кIвалахзавай уьлкведин тахминан 900 вузди ва филиалди, гьа жергедай яз кьилдин ксарин хсусият тир ва чпихъ бюджетдин чкаяр авай кIелунин идарайри кьабулда.
Эгер идалай вилик сервисдин куьмекдалди анжах бюджетдин чкайрик экечIиз жезвайтIа, гила ада бюджетдилай къерехдай тир, гьакIни целевой ва кьезилвилер авай чкайрикни экечIдай мумкинвал гузва.
Идалайни гъейри, конкурсрин сиягь датIана цIийи хъувунин системадин кIвалахни хъсанар хъувунва: дегишвилер арза рекье тунмазди тадиз жеда. И делил са шумуд рекьяй арзаяр гузвай абитуриентар патал важиблуди я, гьикI лагьайтIа, гила абуруз гьар са рекьяй гьакъикъи гьалар, кIваляй къецел экъечI тавуна, аквада.
Суперсервис “Госкъуллугъар” порталда ачухиз жезва. Ана хсуси кабинет авай абитуриентдивай лазим тир вуз ва герек рехъ хкягъиз, кьабулдай комиссиядиз арза ракъуриз, документриз талукь делилар ва имтигьанрин нетижаяр ахтармишиз, кьабулнавайвилин гьакъиндай информация къачуз жеда.
“Вуздик онлайн-къайдада экечIун” къуллугъ 2020-йисан гатуз кардик кутунай. Алатай йисуз адакай тахминан 44,5 агъзур абитуриентди менфят къачуна, абуру 442 вуздиз ва 93 филиалдиз тахминан 480 агъзур арза гана.
Къейд ийин, 2022-йисуз документар вугунин ва абитуриентар кьабулунин вахтар дегиш хьанва. ИкI, арзаяр ва документар кьабулдай вахт 20-июндилай геж хьун лазим туш. 27-июндиз конкурсриз талукь делилар чапда. 28-июлдиз вуздиз кьабулуниз разивал гузвай арзаяр кьабулна куьтягьда. 30-июлдиз приоритет яз (конкурсда сад хьтин баллар авайбурун арадай сад хкягъун) кьабулунин буйругъар акъатда. 3-августдиз асул чкайриз кьабулунин гьакъиндай арзаяр кьабулна куьтягьда ва 8-августдиз асул чкайриз кьабулнавайдан гьакъиндай буйругъар чапда.
«Лезги газет»
