Мисриханова (Къазиметова) Гуьлжагьан Шамсудиновнадикай чи кIелдайбуруз 2016-йисуз яратмишунардайбурун “Булах” кIватIал тешкилайдалай ва 2017-йисуз кIватIалдик акатзавай гьевескар шаиррин “Булахдин чешмедал” ктаб акъудайла, малум хьана. Адалай гуьгъуьниз илгьамдин рекьяй пай ганвай дишегьлиди лезги ва урус чIаларал шииратдин ва гьикаятдин “Кьисмет”, “Пуд стIал”, “КIахцугъар ва кIахцугъвияр”, “Уьмуьрдин рекьер” ва уртах “Илгьамдин булахар” ктабар акъудна.
И йикъара кIелдайбурув Мисрихановадин “Мавел” издательстводи акъуднавай нубатдин “КIанивилин сифте лепе” тIвар алай ктаб агакьна.
Ктабда гьа и тIвар алай повестди еке чка кьазва. Яратмишдай рехъ шиирар кхьинилай гатIунай Гуьлжагьана гьикаятдани вичин алакьунар къалурзава. Хайи хуьруькай, агьалийрин яшайишдикай, кьисметрикай ктаб кхьей касдин гьевес акваз-акваз ачух хьана. Ада чи хуьрера малум тир Чуьхвер Магьсудан къаравилияр кIватIна, абурал вичин бажарагъдин бегьерарни алава хъувуна.
Г.Мисрихановади, кIвалин кайваниди, рухвайрин, хтулрин дидеди, бубади азад вахтунда уьмуьрдин тежрибадикай менфят къачуз, куьлуь новеллаяр кхьизва. Абур “Яшайишдин агьвалатар” паюна ава.
“КIанивилин сифте лепе” повесть жаванар патал тербиядин, милли адетрал амал авунин, ахлакьдин, марифатдин ерияр вине кьунин, рикIе пайда жезвай ашкъидин сифте гьиссерив, вири терефар фикирда кьуна, эгечIунин жигьетдай хъсан чешме я. Авторди рикIе кIанивилин сифте цIир ганвай жаван рушан къамат чIугунва. Са патахъай ам шад я, адал рикIи чIугвадай гада гьалтнава. Муькуь патахъай адаз вуч ийидатIа чизвач. Хуш хьанвай гада маса миллетдин, маса государстводин векил я. Ада вичин ашкъидикай ачухдиз малумарзава. Амма повестдин кьилин игит Дария, вири рикIелай алудна, вич муьгьуьббатдин деринриз вегьедай руш туш. Ада вичин миллетдикайни, диде-бубадикайни, хайи чIалакайни, гележегда арадал къведай четинвилерикайни фикирзава…
Ктабда кIанивиликай, бахтуникай, инсанрин хесетрикай, уьмуьрдикай маналу къейдер, фикирар, акьуллу келимаяр, мезелиярни гьатнава.
РикIел хкин: Гуьлжагьанан хизан 2004-йисалай Голландияда яшамиш жезва. Гуьлжагьана Утрехт шегьердин яшлубурухъ галаз алакъалу идарада зегьмет чIугвазва. Гьар гатун варцара хайи ватандиз хквезва.
Чна Гуьлжагьан Мисрихановадиз цIийи ктаб тебрикзава.
Абад Азадов
