Чи ватанэгьлияр — гьар сана

Футболдал рикI алайбуруз ери-бине Эминхуьряй тир  Сердер  Сердерован  тIвар лап хъсандиз таниш я. Сифтедай адакай Россиядин чемпионатда, премьер-лигада Москвадин ЦСКА командада къугъвадайла хабар хьана. Гьужумдайд­и тир ада уьлкведин жаванрин хкя­навай командадик квазни гзаф турнирра вичин алакьунар къалурна.

Сердера сифтедай вердишвилер Махачкъалада республикадин жаванрин олимпийский резервдин школада къачуз башламишна. Ала­кьунар авай жавандиз Моск­вадиз, машгьур ЦСКА командадиз теклифна. Адан составда аваз С.Сердеров са шумуд сезонда къугъвана ва устадвал хкажна.

Махачкъаладин «Анжи» командадиз меценат Сулейман Керимова къаюмвал ийиз башламишайла, аниз Россиядин ва къецепатан уьлквейрин машгьур футболистриз, гьабурукай яз Роберто Карлосаз, Это-Одиз, Буссуфадиз, Габуловаз, Траоредиз ва масабуруз теклифна. “Анжидиз” теклифай футболистрин арада Сердер Сердеровни авай. Уьлкведа ва дуьньяда машгьур футболистрин арадани ам чукурунин йигинвилелди, кьетIен техникадалди, акси командайрин варариз тупар ягъуналди тафаватлу тир. Гьайиф хьи, пулунин такьатар гудай кас амукь тавур “Анжи” командадин гьаларни четин хьана, машгьур футболистар маса командайриз хъфена.

Махачкъаладин “Анжи” командадилай гуьгъуьниз С.Сердеров жуьреба-жуьре йисара “Урал” (Екатеринбург), “Крылья Советов” (Самара), “Енисей” (Красноярск), гьакI­ни Польшадин “Краковия”, Болгариядин “Славия”, Хорватиядин “Интер” ва “Истра-1961”, Венгриядин “Мезёкёвешд” командайра къугъвана.

Алай вахтунда Сердер Сердеров Къазахстандин “Актобе” командада къугъвазва. И команда уьл­кведин чемпионатда 8-чкадал ала. “Актобе” командадин руководстводи ва тренерри Сердерак еке умудар кутунва.

Вахъ цIийи командада еке агалкьунар хьурай, гьуьрметлу ватан­эгьли!

Хазран Кьасумов