Израилди къурху гузва
Израилдин оборонадин министр Авигдор Либермана къейднавайвал, эгер Сирияди Израилдин ВСС-дин аксина Россиядин ракетайрин С-300 комплексар ишлемишиз хьайитlа, чпи абур тергда. Министрдин гафар “Ynetnews” чешмеди раижнава.
“Урусри Сириядиз ракъурзавай оборонадин яракьар чаз акси яз ишлемиш тавун чун патал важиблу я”, — лагьана ада. Къейдзавайвал, акси дуьшуьшда Израилди талукь тирвал жаваб гуда. “Эгер са ни ятlани чи самолетар ягъиз хьайитlа, чна ам тергда”, — лугьузва А.Либермана.
14-апрелдиз США-ди, Великобританияди ва Францияди Сириядал гьужум авурдалай кьулухъ, 20-апрелдиз, Россиядин къецепатан крарин министр С.Лаврова Сириядив яракьар агакьаруникай ихтилатнай. Гуьгъуьнлай малумарайвал, Сириядин армиядиз С-300 “Фаворит” ракъурунин месэла гьялнава.
Макгрегоран къаст
Какахьай женгерай (ММА) Ирландиядин спортсмен Конор Макгрегоран тренер Оуэн Роддиди Макгрегораз UFC-дин чемпион Гьабиб Нурмегьамедовахъ галаз бягьс тухуз кlанзавайдакай ихтилатна. Идан гьакъиндай “Allboxing” чешмеди хабар гузва.
“Флойд Мэйуэзерахъ галаз бягьс тухвайдалай кьулухъ Конора заз икl лагьана: “Зи ва Гьабибан бягьсиникай ихтилатар физва. Завай и бягьс Россияда кьиле фидайвал ийиз жеда. Чна вири “Рокки” фильмда хьиз тешкилда. Чун Сибирдиз фида, живедин винел спортдал машгъул жеда, кlурт алукlна, живедай алерар ялда”, — лагьана Роддиди.
Тренерди Конорахъ галаз Россиядиз финик кьил кутазвач. 19-апрелдиз Нурмегьамедова къейд авурвал, Макгрегорахъ галаз 2018-йисуз бягьс кьиле фин мумкин я. Нурмегьамедова Макгрегор куьчедални гатаз гьазур тирди лагьана.
Нурмегьамедов пешекарвилин женгера садрани магълуб хьанвач. Адахъ 26 гъалибвал (8 нокаутдалди) ава. Макгрегорахъ лагьайтlа, 21 гъалибвални 3 магълубвал ава.
Танкар ракъурзава
“Twitter” соцсетда эцигнавай видеодай аквазвайвал, ротациядин сергьятра аваз, США-дай Европадин атлуйрин 1-дивизиядин 1-танкарин бригададай танкар рекье твазва. Идан гьакъиндай “lenta.ru” чешмеди хабар гузва.
Малумарзавайвал, Европадиз кьуд агъзурдав агакьна аскерар ва военный тадаракар рекье твазва. Бригададин ихтиярда кьудкъанни цlуд М1 “Абрамс” танк, Польшадин вишни яхцlур БМП BWP-2000 ва Америкадин БМП М2 “Брэдли”, артиллериядин тадаракар ва маса яракьар ава. Европадиз яракьар ракъурунин месэладин гьакъиндай гьеле и йисан январдин вацра раижнай.
НАТО-дин рагъэкъечlдай пад мягькемарунин Atlantic Resolve операциядин сергьятра аваз, 2017-йисан январдиз Польшадиз США-дин танкистрин десте фенай. Пентагонди Польшадиз вири санлай 3,5 агъзур аскер, 400-лай гзаф цепь алай ва 900-лай гзаф чархарал алай техника, гьа жергедай яз 87 танк ва хейлин маса яракьар ракъурун планламишнавай.
Яшлу выпускник
Америкадин Толедо шегьерда Дуьньядин кьвед лагьай дяведин ветеранди 68 йис инлай вилик вичи гадарай университетдин диплом вахчуна, хабар гузва “Associated Press” чешмеди.
США-дин ВМС-дин пилот Боб Баргер 1950-йисуз Толедо шегьердин университетдик экечlнай. Пуд йис алатайла, хизан ва кlвалах себеб яз, адаз вуздиз фидай мумкинвални вахт амукьнач. Идан гьакъиндай са шумуд йис инлай вилик ветерандихъ галаз таниш хьайи университетдин къуллугъчидиз хабар хьана. Ада архивар къарагъаруникди малум хьайивал, Баргера кlелай курсари алай вахтунда студентри кьве йисуз кlелайдалай кьулухъ къачузвай диплом къачудай мумкинвал гузва. Амма 1950-йисуз и жуьредин диплом авачир.
Гьа икl, 96 йисан яшда авай Баргер университетдин тарихда сифте яз виридалайни яшлу выпускник хьана. Диплом къачурдалай кьулухъ ветеранди, вичиз са хъсан кlвалах жагъурда лугьуз, зарафатзава.
Сенаторар акси я
Америкадин сенаторрин дестедиз Туьркиядиз цlийи F-35 истребителар гун акъвазариз кlанзава. Идан гьакъиндай “Reuters” чешмеди хабар гузва. Ихьтин фикирдал атунин себеб Америкадин кешиш Эндрю Брансон Туьркияда дустагъ авун я.
Анкарадиз Америкадивай 116 кьван F-35 истребителар маса къачуз кlанзава. Амма, Америкадин сенатор Джеймс Ленкфордан фикирдалди, Туьркиядин президент Режеп Тайип Эрдогана “къанун саймишзавач”, гьавиляй адаз ахьтин техника маса гун “гзаф хаталу я”.
Сенаторди алава хъувуна хьи, эхиримжи вахтара Туьркияди кьабулзавай стратегиядин къарарар “США-дин итижриз акси къвезва”.
2016-йисан 16-июлдин йифиз Туьркияда гьукуматдин къурулушда дегишвилер тваз кlан хьунин алахъунар кьиле фенай. Арадал атай гьаларин жигьетдай гьукумди чпиз акси яз экъечlзавай исламдин къуллугъчи, США-дин Пенсильванияда яшамиш жезвай Фетгьуллагь Гуьленак тахсир кутунай. Бунт алатайдалай кьулухъ 50 агъзур кас кьван дустагънай, идалайни гъейри, 140 кас кьван кlвалахдикай магьрум яз амукьна. Дустагънавайбурун арада Америкадин кешиш Брансонни авай. Эрдоганахъ галаз гуьруьшмиш хьайила, Дональд Трампа адавай Брансон азад хъувун тlалабна, Туьркиядин президентди лагьайтlа, кешиш Гуьленахъ дегишарун теклифна.
Гьазурайди — Куругъли Ферзалиев
