Лезгийрихъ гъурбатра жуьреба-жуьре жавабдар къуллугърал алай баркаллу, чпин тlварар краралдини агалкьунралди машгьурзавай ватанэгьлияр гзаф ава. Чечнядин здравоохраненидин министр, лезги халкьдин дамах Эльхан Абдуллаевич Сулейманов гьа ихьтинбурукай сад я.
Эльхан 1974-йисан 15-июлдиз Азербайжан республикадин Кцlар райондин Яргунрин хуьре дидедиз хьана. Ада Азербайжандин медицинадин университет тафаватлудаказ куьтягьна. 1998-1999-йисара Баку шегьерда онкологиядин илимдин центрада кlвалахна. Гуьгъуьнлай Москвада Н.Блохинан тlварунихъ галай онкологиядин центрада аспирантура куьтягьна, медицинадин илимрин кандидатвилин дережа къачуна. 2012-2014-йисара Г.Н.Сперанскийдин тlварунихъ галай педиатриядин илимдинни ахтармишунрин институтда илимдин чlехи къуллугъчи яз кlвалахна.
Ватанэгьлиди США-да авай дуьньядин виридалайни чlехи, М.Андерсонан тlварунихъ галай Онкологиядин центрада ва Германияда кlвалахдин рекьяй чирвилерин дережа хкажна. Тежрибалу, алакьунар авай духтур-онколог тир Эльхан Абдуллаевичаз къецепатан са шумуд чlални чизва.
2014-йисан мартдилай ада Чечняда здравоохраненидин рекьяй кьилин меслятчивиле, Грозный шегьерда республикадин онкологиядин диспансердин кьилин духтурвиле кlвалахна. Эльхан Сулейманов Чечнядиз Рамзан Къадирован теклифдалди атана. 2015-йисан ноябрдилай ам здравоохраненидин министрдин сад лагьай заместителвиле тайинарна.
Кардив мукьуфдивди эгечlзавай халис пешекар гьар йисуз къуллугъдин рекьяй вини дережадиз хкаж хьуни адан алакьунриз Чечнядин кьил Р.Къадирова лайихлу къимет гузвайвилин гьакъиндай шагьидвалзава. 2016-йисан 28-апрелдиз Э.Сулейманов Чечнядин здравоохраненидин министрвиле тайинарна.
Чи ватанэгьли министрвиле тайинардайла, Р.Къадирова ингье вуч лагьанатlа: “Чаз куьн республикада здравоохранение еридин цlийи дережадиз акъудиз жедай кас яз аквазва. Къенин юкъуз халкьдиз медицинадин рекьяй ийизвай къуллугъ хъсанарунин серенжемар кьабулун, лап хъсан пешекарар гьазурун ва республикадиз тежрибалу духтурар теклифун герек я”.
Республикадин регьбердин умудар бажарагълу министрди агалкьунралди уьмуьрдиз куьчуьрмишзава. Гьеле “Республикадин онкологиядин диспансердин” кьилин духтурвиле кlвалахай чlавалай адалай медицинадин хиле хъсанвилихъ хейлин дегишвилер тваз алакьна.
И мукьвара чав агакьай шад хабар кьетlендаказ къейд ийиз кlанзава: Москвада П.Герценан тlварунихъ галай МНИОИ-да Эльхан Сулейманова докторвилин диссертация агалкьунралди хвена. Чечнядин лезги министрди хкягъай темадай 2006-2016-йисара ахтармишунар тухванай.
“Лезги газетдин” редакциядин коллективди ватанэгьлидиз илимдин чlехи дережа рикlин сидкьидай мубаракзава. Къуй адахъ гележегда мадни зурба агалкьунар хьурай!
Гьазурайди — Куругъли Ферзалиев
