И йикъара Сулейман-Стальский райондин КIварчагърин хуьре лишанлу вакъиа кьиле фена: Бабаеврин хизандив цIийи кIвал шад гьалара ишлемишиз вахкана.
РикIел хкин: алай йисан 18-январдиз КIварчагърин хуьре яшамиш жезвай Бабаеврин хизандин кIвали цIай кьуна, ам михьиз канай. Гуьгъуьнин юкъуз райондин Кьил Нариман Абдулмуталибов чкадал фена. КIвалерин иеси Тават Бабаевадиз пулдин куьмек гана. Бабаеврин хизандиз “Корчагский” СП-дин администрациядини куьмекна.
“Лезги газетди” виликдайни хабар гайиди тир, Бабаеврин хизандиз мергьяматлувилин “Инсан” фондуни (генеральный директор Мугьаммадрасул Агьмедов я) ва Сулейман-Стальский районда кардик квай адан филиалди иллаки еке куьмекар гана. И фондуни малумат гайила Бабаеврин хизандин тIварунихъ пулдин такьатар чара авурбурун арада райондин Кьил Нариман Абдулмуталибов, райондин администрациядин кьилин сад лагьай заместитель Лацис Оружевни авай.
ИкI, “Инсан” фондунин иштираквал ва куьмек галаз, 4 варзни алат тавунмаз, Бабаеврин хизан патал 56 квадратный метрдин цIийи кIвал эцигиз ва анин къене патан кIвалахар кьилиз акъудиз алакьна.
КIвал шад гьалара ишлемишиз вахкуниз талукьарнавай мярекатдал рахай Нариман Абдулмуталибова “Инсан” фондунин кIвалахдиз еке къимет гана, адан кьиле авай ксариз чухсагъул малумарна. “Дуьньядал хъсан инсанар гзаф алайдахъ чун мад сеферда инанмиш хьана. Мергьяматлувилин “Инсан” фондунин куьмекдалди, гьакIни чарадан тIал жувандай кьуналди ва рикIин ачухвал къалуруналди са куьруь вахтунда Бабаеврин хизан патал цIийи кIвал эциг хъувуна. Заз мергьяматлувилин “Инсан” фондунин, гьакIни Кьасумхуьрел кардик квай адан филиалдин кьиле авай ксариз, райондин имамрин Советдин председатель Гьасан Амахановаз, кIварчагъвийриз ва мергьяматлувал къалурай гьар са касдиз чухсагъул лугьуз кIанзава”, — къейдна Н.Абдулмуталибова.
Мярекатдал рахай амай вири ксарини, гьа гьисабдай яз “Корчагский” СП-дин кьил Жалил Къурбанмегьамедова, Гьасан Амаханова, “Инсан” фондунин векил Эльмар Яралиева, агъсакъалрин Советдин председатель Зейнуллагь Наврузова, хуьруьн собранидин депутат Даир Яралиева ва масабуру мергьяматлувилин серенжемдин иштиракчийриз сагърай лагьана.
КIвалин сагьиб Тават Бабаевади райондин муниципалитетдин, “Инсан” фондунин кьиле авай ксарин, гьам пулдин такьатралди, гьамни теселли гуналди куьмек гайи гьар са касдин тIварцIихъ алхишдин гафар лагьана.
КIварчагъвияр патал хьанвай мад са хъсанвал: мергьяматлувилин серенжемдин сергьятра аваз “Рычал-Су” заводди КIварчагъиз хъвадай яд гъанва. Яралиеврин хизандин патай савкьат-алай аямдин вири истемишунриз жаваб гузвай спортдин комплекс — и мукьвара ишлемишиз вахкуда.
Гьазурайди — Рагнеда Рамалданова
