19-майдиз “Лезги газетдин” редакцияда гьар йисуз газет кIелзавайбурун арада Ислам диндиз талукь яз кьиле тухузвай конкурсдин гъалибчийрив савкьатар вахкана. Къейд ийин хьи, цIи и конкурс тешкилайбурун арада “Лезги газетдин” редакцияни медениятдинни марифатдин Алкьвадар Гьасанан тIварунихъ галай мукьвара арадал гъанвай центр авай.
Лагьана кIанда, ихьтин конкурс республикадин милли чIаларал акъатзавай мад са изданидини тухузвач. Идалайни гъейри, амайбурулай тафаватлу яз, “Лезги газетдин” гьар са нумрада Исламдиз талукь рубрикани ава.
Вилик йисара хьиз, цIини конкурсдин суалар “Лезги газетдиз” акъатзавай диндин алим Ямин Мегьамедован макъалайрин бинедаллаз гьазурнавай. 25 суалдиз жавабар гуналди, иштиракчийривай къазанмишиз жезвай баллрин вини кьадар 48 тир. КIвалахриз къимет Я.Мегьамедова гана.
Конкурсдин нетижайралди 1-чка Ахцегь райондин Луткунрин хуьряй тир Абдулла Мегьамедова кьуна. Адаз диплом, телефон, 3 агъзур манатдин кьадарда авай пулдин премия, диндин ктабар (“Пак Къуръан ва адан манайрин таржума лезги чIалал”, “Пайгъамбаррин варисар”, “Тажвид-илим”, “Исламдин эдебар, ахлакьар ва дуьаяр”, “Мусурман хуьдай къеле”, “Пайгъамбардин уьмуьрдин рехъ”, “Инсаниятдиз чешнелу ксар”, “ЧIехи гунагьар” — автор Я.Мегьамедов) гана.
2-чка СтIал Сулейманан райондин Алидхуьрелай тир Демир Шагьбановаз кьисмет хьана. Адазни диплом, электронный Къуръан, 2 агъзур манатдин кьадарда авай пулдин премия, диндин ктабар ва маса пишкешар гана.
3-чкадиз лайихлу хьайи Махачкъаладай тир Наби Алиметоваз диплом, Къуръан кIелдай вацран кIалубда аваз гьазурнавай чирагъ, 1 агъзур манатдин кьадарда авай пулдин премия, диндин ктабар ва маса савкьатар гана.
Гъалибчийрив пишкешар вахкунин мярекатда “Лезги газетдин” кьилин редактор Мегьамед Ибрагьимова, сиясатдин отделдин редактор Нариман Ибрагьимова, алим Ямин Мегьамедова ва масабуру иштиракна.
Агьмед Магьмудов
