Алатай гьафтеда Москвада кьуршахар кьунин пуд жуьредай (азаддаказ, грекринни римлуйрин жуьреда ва дишегьлийри кьуршахар кьун) кьиле фейи Иван Поддубныйдин сад лагьай международный мемориалда, Россиядай хьиз, Белоруссиядай, Къазахстандай ва Монголиядай тир 140-дав агакьна спортсменри чпин устадвал къалурна. Ана иштиракайбурукай виридалайни чIехиди Дагъустандин хкянавай команда тир. Санлай къачурла, чи спортсменри хъсан нетижаярни (вири санлай — 16, абурукай къизилдин 4 медаль) къазанмишна. Амма чи машгьур спортсмен Даурен Куругълиев и акъажунрани гимишдин медалдиз лайихлу хьана.
Акъажунра 86 кг-дин заланвал авайбурун арада устадвал къалурзавай Д.Куругълиеваз дагъустанвияр тир Аманула Расулов — 9:1 ва Арсенали Мусалалиев 9:3 гьисабралди кумукьна. Финалда ам Кеферпатан Осетия-Алания республикадай тир, ХМАО-Юградин патай экъечIзавай Артур Найфоновахъ галаз бягьсиниз экъечIун “адетдиз” элкъвезвай хьтинди я. Чи уьлкведа идалай виликни кьиле фейи са шумуд акъажунрин финалрин бягьсер рикIел хтуни ихьтин фикирдал гъизва. И кьве спортсмендин бягьс “акьалтI тийидайдаз” элкъвенва. Виликан са шумуд бягьсина хьиз, и сефердани, арада анжах са баллдин тафават аваз, чи ватанэгьли 2-чкадиз лайихлу хьана.
Спортдин мярекатда грекринни римлуйрин жуьреда кьуршахар кьазвайбурун арада чи машгьур мад са ватанэгьлиди — Анвар Аллагьярова (60-кг-дал къведалди заланвал авайбурун арада) — вичин къуватар ахтармишна. Ярумчух финалда амни, арада са баллдин тафават аваз, 3:4 гьисабдалди Динисмаил Бамматоваз кумукьна, буьруьнждин медалдиз лайихлу хьана.
Мемориалда, винидихъ къейднавайвал, панкратиондай ва грэпплингдайни спортсменрин арада къизгъин бягьсер кьиле фена. ИкI, чи ватанэгьли Расул Мамедбегова (77 кг-дал къведалди заланвал авайбурун арада) грэпплингдин GI (кимоно алаз) жуьредай къизилдин медаль къазанмишна.
Рагнеда Рамалданова
