РФ-дин промышленностдин ва алишверишдин министерстводи недай суьрсетдин жигьетдай уьлкведин хатасузвал артухарун патал Россияда санлай ва кура-кура маса къачудай базаррин кьадар гзафарун пландик кутунва.
Идаради гьазурнавай теклифра къейднавайвал, ихьтин базарра шей маса гудай ихтияр виридаз гуда. И кар патал багъларин иесийри, бегьердин пай маса гун патал чеб ИП, яни кьилдин карчияр яз регистрация авун лазим жедач. Фермерривай чпин суьрсет, арачияр галачиз, муьштерийриз гъиляй-гъилиз маса гуз жеда. Суьрсетдин хатасузвал ветеринарно-санитариядин экспертизайри ахтармишда, кхьизва “Известия” газетди.
РФ-дин Минпромторгдин кьилин заместитель Виктор Евтухова къейдзавайвал, санлай маса гудай-къачудай недай суьрсетдин базаррин (ОПР) кьадар артухаруни санлай са шумуд месэла гьялдай мумкинвал гуда. Лежберривай производство артухариз жеда, гьикI лагьайтIа, абуруз суьрсет маса гудай рехъ ачух жеда. ГьакIни сагъламдаказ гьуьжетунин нетижада уьлкведа продуктрин къиметар гуьнгуьна тваз алакьда.
Идарада гьисабзавайвал, Россияда ихьтин базарар гьикьван пайда хьун мумкин ятIа лугьун гьелелиг фад я. Абур арадал гъун государстводин гьуькумдин регионра авай органрин везифайрик акатзава. Ихьтин майданар гьикьван лазим ятIа субъектри чпи тайинарда. Гьа са вахтунда базаррин везифаяр тамамарзавай тIимил кьадар объектар уьлкведа авазва.
Уьлкведа ихьтин базарар гьамиша хьайиди я. Амма, гьайиф хьи, гьам хуьруьн майишатдин суьрсет гьасилзавайбур, гьамни муьштерияр патал иллаки важиблу чкаяр тир абур эхиримжи 20-25 йисан вахтунда тамамдаказ терг авунал гъана.
«Лезги газет»
