Чи ватанэгьлияр — гьар сана
Гьабибов Жавидин Фазилович 1996-йисуз Мегьарамдхуьруьн райондин Советский хуьре дидедиз хьана. 2011-йисуз 9-класс куьтягьна, Астрахань шегьердин гьуьлерин колледждиз гьахьна. 2015-йисуз анаг агалкьунралди куьтягьна. Ана кьуд йисузни ам курсунин старшина хьана. Вичихъ галаз кIелзавай курсантрин ва муаллимрин арада ада гьуьрмет къазанмишна.
Колледж куьтягьай йисуз Стамбулдин портунихъ галаз икьрар кутIунна ва адакай “ВФ-ТАНКЕР-4” гимидин капитандин куьмекчи хьана. Гьа йисуз ам гьуьлерин ва вацIарин улакьрин академиядиз гьахьна. КIвалахал акъвазай вад йисалай адакай капитандин чIехи куьмекчи хьана.
2021-йисуз академия куьтягьай Жавидин Каспий гьуьлуьн портарал гуьзчивалдай (государственный инспекциядин) инспекторвилин къуллугъдал тайинарна.
2022-йисан январдиз ада Астрахань шегьерда “АРМАТОР” компания арадал гъана. Компаниядин макьсад морякар гьазурун ва абур кIвалахдай чкайралди таъминарун я.
Жавидина Кьиблепатан Дагъустандин жегьилрикай пешекарар гьазуруниз еке фикир гузва. ИкI, и компанияда цIудралди чи гадайри кIвалахзава. Жавидин Фазиловича 2017-йисалай вичин хсуси такьатралди боксдай райондин ва республикадин турнирар тухвана. ЦIи ада 6-8 майдиз Советский хуьре кьезил атлетикадай турнир тешкилна ва кIвенкIвечи чкаяр кьур 6 касдиз кубокар, медалар, грамотаяр, пулдин пишкешар гана.
Ж.Гьабибова регьбервал гузвай компаниядихъ Кьиблепатан Дагъустандин жегьилар къецепатан компанийра кIвалахдалди таъминарунин ният ава. ИкI, Советский хуьряй 25 морякди маса уьлквейрин гимийра аваз гьуьлерал сирнавзава.
“Заз зи къуллугъдин дережа хкаж хьунин карда стхаяр тир ахцегьвийрикай — Пашаеврикай, иллаки Пашаев Камалдинакай куьмек хьана. Адаз Астраханда вичин порт ва флот ава. Заз гьар йисуз “АРМАТОР” компаниядин такьатралди Кьиблепатан Дагъустанда спортдин рекьяй турнирар тухудай ният ава”, — лугьузва ада.
2020-йисуз ам Зуьруьятал эвленмиш хьана. Абурухъ 8 варз хьанвай бицIек ава. Жавидинан дах Фазила “МОСТПРОЕКТ” компанияда прораб яз кIвалахзава. ЧIехи буба Нариман (Дагъустандин лайихлу агроном) ва баде Пакизат пенсияда ава. Ата-буба Мегьарам Ватандин ЧIехи дяведин ветеран тир.
25 йисан яшда аваз гимидин капитан хьун кьериз-цIаруз жезвай дуьшуьш я. Чаз Жавидинахъ мадни еке агалкьунар хьана кIанзава.
Сулейман Пашаев
