Есирвиле вугана

Мариуполдин “Азовсталь” комбинатда чуьнуьх хьанвай боевикрикай эхиримжи суткада 694-да, яракьар гадарна, чеб есирвиле вугана. Идакай 18-майдиз Россиядин оборонадин минис­терстводи хабар гана.

Къейдзавайвал, есирвиле вугай 29 боевикдал хирер алай. 16-майдилай “Азовсталдай” 959 боевикди чеб есирвиле вугана, абурукай 51 хирер алайбур я. Медицинадин куьмекдин игьтияж авай вирибур ДНР-дин мулкара авай Новоазовскдин азарханадиз рекье тунва.

И йикъара РФ-дин оборонадин министерстводи хабар гайивал, “Азовсталда” чуьнуьх хьанвай Украинадин аскеррихъ галаз хирер хьайибур хаталу чкадай ахкъудунин меслятдал атанвайдакай малумарнай. И макьсаддалди Россиядин терефди гуманитарный дегьлиз ачухна.

Госдумадин Председатель В.Володина вичин Телеграм-каналда малумарайвал, чи уьлкведи есиррихъ галаз инсанвилелди рафтарвилер ийизва.

“Миллетбазрикай рахайтIа, и жигьетдай чи фикир дегиш хьун лазим туш: абур военный тахсиркарар я, абурун суд-дуван авун па­тал чна вири жуьредин алахъунар авуна кIанда”, — лагьана ада.

18-майдин экуьнахъ «Новости» РИА-ди хабар гайивал, 91 йикъан къене Украинадин яракьлу къуватри ДНР-диз 2954 сеферда гуьлле гана. И гьерекатар патал абуру дяведин  28,4 агъзур суьрсет ахъайна.

18-майдин экуьнахъ РФ-дин оборонадин министерстводи малумарай делилралди, эхиримжи суткада РФ-дин ВКС-дин авиацияди 270-далай виниз миллетбазар тергна ва дяведин 54 техника къайдадикай хкудна. Махсус серенжем кьиле тухунив эгечIайдалай инихъ Россиядин Яракьлу Къуватри Украинадин 172 самолет ва 125 вертолет, зенитный ракетайрин 311 комплекс, пилот галачиз лув гудай 927 аппарат, 3139 танк ва дяведин маса машинар, РСЗО-дин 389 установка, артиллериядин ва маса 1548  яракь, дяведин суьрсет, военный махсус 2997 автомобиль тергна.

Кьилиз акъудиз гьазур я

Франциядин президент Э.Макрона Украинадин президент В.Зеленскийдиз малумарнавайвал, Францияди Украинадиз яракьар ракъурун давамарда. Идакай “Новости” РИА-ди хабар гузва.

Парижда авай Елисейский дараматдин сайтда чапнавай делилралди, Макрона Украинадин патай атай гьар са тавакъудиз тамамвилелди жаваб гун кьетIнава. Кьилди къачуртIа, оборонадин, кудай затIарин, гуманитарный, экономикадин ва пулунин такьатрин жигьетрай куьмекар гун хиве кьунва.

Макрона Зеленскийдиз мадни лагьана хьи, Украина Евросоюздиз кьабулунин арзадиз, Европадин комиссияди гайи къиметдин бинедаллаз, Европадин советдал июндиз килигда. Малум тирвал, Евросоюздик экечIунин патахъай Зеленскийди 28-февралдиз документдал къул чIугунай. Пакадин юкъуз Европарламентди Украинадиз уьлкве-кандидат лагьай дережа ганай.

РФ-дин Президентдин пресс-секретарь Д.Пескова къейд авурвал, РагъакIидай пата Украина яракьривди ацIуруни Россия­динни Украинадин арада кьиле физвай рахунриз хийир гудач ва абуру чIуру патахъай таъсирда.

Украинадикай багьна кьунва

Россиядиз акси яз малумар тавунвай дяве кьиле тухун патал­ РагъакIидай патаз Украина багьна хьанва. Ихьтин фикир Россия­дин Совбездин секретарь Н.Патрушева малумарна. Адан гафар “Новости” РИА-ди раижна.

Къейд авурвал, Россиядин гьерекатрилай аслу тушиз, 2022-йисан февралдилай хейлин вахтар вилик РагъакIидай патаз дяведик кьил кутаз кIан хьунин  къастар ачухдаказ малум хьанвай. “Къудратлу ва аслу тушир Россия РагъакIидай патаз герекзавач”, — алава хъувуна Патрушева.

НАТО-дик экечIзава

Финляндиядинни Швециядин гьукумдарри НАТО-дик эке­чIу­нин патахъай официальный арзаяр вуганва. Финляндиядин парламентдин 200 векилдикай 188 касди уьлкве НАТО-дик эке­чIу­нилай рази тирвилин сес гана, хабар гузва “Новости” РИА-ди.

Кьве уьлкведин векилри НАТО-дин генсекдив альянсдик экечIунин документар вахкана.

ЦIийи къанун теклифзава

Гьукумдин органри соцсетра чпин хсуси аккаунтар арадал гъунин ва анра важиблу малуматар, хабарар чапунин чара­сузвал тестикьардай законопроектдиз 17-майдиз Госдумада сад лагьай­ сеферда яз килигна. Идакай “ТАСС” чешмеди хабар гузва.

Госдумадин информациядин сиясатдин комитетдин кьил А.Хинштейна идалай вилик малумарайвал, къанунда гьукумдин органри соцсетра аккаунтар арадал гъун мажбур тирди къалурда.

Алава хъувурвал, “Сад тир Россия” партияди теклифнавай законопроектдин макьсад инсанриз федеральный дережадилай муниципальный дережадал кьван гьукумдаррихъ галаз алакъадиз экъечIдай къулайвал хьун я.

«Лезги газет»