14-майдиз СтIал Сулейманан райондин Цмуррин мектебда мергьяматлувилин “ЛЕКИ” фондуни, алим ва жемиятдин крарал активнидаказ машгъул хьайи кас тир Мариф Жамединович Къадимован тIвар рикIел хуьниз талукьарна, информатикадай районрин уртах олимпиада кьиле тухвана. Олимпиадада Кьиблепатан Дагъустандин Мегьарамдхуьруьн, СтIал Сулейманан, Дербент, Хив ва Кьурагь районрин 15 мектебдин 8-10-классра кIелзавай аялри иштиракна.
Олимпиададин нетижада 1-чка Мегьарамдхуьруьн 1-нумрадин юкьван мектебда кIелзавай Гьамид Рагьимова кьуна ва 10 000 манатдин пишкеш къачуна. 2-чкадиз ва 7 000 манатдиз СтIал Сулейманан райондин Кьасумхуьруьн 1-нумрадин мектебда чирвилер къачузвай Максим Селимов лайихлу хьана. 3-чка ва 5 000 манат Хив райондин ЦIийи Фригърин юкьван мектебдин ученик Рамазан Рамазанова къачуна.
Къейд ийин хьи, сифтегьан чкаяр кьур аялрин муаллимризни 3000 манатдин кьадарда аваз пулдин пишкешар, гьакIни грамотаяр, чухсагъулдин чарар, лезги чIалалди гьазурнавай цлан календарар, Фондунин лишанар алай шейэр, Мариф Къадимован ктабар гана. Идалайни гъейри, олимпиададин гьар са иштиракчидив “Леки” фондуни вичин тIварцIихъ гьазурнавай махсус сертификат агакьна.
Олимпиададин тешкилатчийри Цмуррин мектебдин директор Сергей Ежоваз ва вири коллективдиз, гьакIни Мариф Къадимован рухваяр тир Замираз ва Мансураз мярекат гьазуриз ва лайихлудаказ кьиле тухуз куьмек гунай рикIин сидкьидай чухсагъул лагьана.
Идалайни гъейри, тешкилатчийри Фондунихъ галаз сих алакъаяр хуьзвай “Лезги газетдин” кьилин редактор Мегьамед Ибрагьимован, пешекарвилелди шикилар ягъай ва видео камерадиз къачур Къудрат Алиеван, гьакIни хсуси такьатрин гьисабдай са куьруь вахтунда призрин фонд кIватIай ва олимпиада кьиле тухуз куьмек гайи “Лекидин” активистрин куьмек чими келимайралди къейдна.
“Чаз гьакIни районрин администрацийрин кьилериз ва чпин гъилик кIелзавай аялар савадлу авун патал гзаф зегьметар серфзавай муаллимриз, идалайни гъейри, чна гзаф гьуьрметзавай Мариф халу рикIел хуьнин лишан яз, гьар йисуз информатикадай олимпиада кьиле тухудай адет кардик кутаз куьмек гайи вири ватанэгьлийриз чухсагъул лугьуз кIанзава. Умуд кутазва хьи, алукьдай йисуз олимпиадада мадни гзаф инсанри иштиракда ва чавай образованидин и проектдин сергьятар гегьеншариз жеда”, — къейдзава Фондуни.
«Лезги газет»
