Накь, 18-майдиз, Дагъустандин Халкьдин Сад лагьай шаир, Ленинан ордендин сагьиб СтIал Сулейман хайи юкъуз Махачкъалада, адан тIварунихъ галай багъда, гьар йисуз адет хьанвайвал, Дагъустандин шииратдин сувар шад гьалара къейдна. Ам, гьамиша хьиз, цIини иниз кIватI хьанвай чи халкьдин жемиятдин ва яратмишунардай интеллигенциядин, гьакI Дагъустандин маса миллетрин векилри, шииратдал рикI алай ксари шаирдин гуьмбетдал цуьквер эцигунилай башламиш хьана…
Мярекат ачухдайла, РД-дин писателрин Союздин председатель М.Агьмедова Дагъустандин шииратдин бине эцигай ксарикай сад тир СтIал Сулейманан шииратдин зурбавал, важиблувал, адалай Дагъустандин шиират кьакьан кукIушриз акъудиз алакьайди, адакай неинки Россияда, гьакI гзаф маса чкайрани чизвайди, чIехи шаирдин яратмишунриз М.Шолохова, Б.Пастернака, О.Мандельштама, И.Суркова ва гзаф маса зурба ксари еке къимет гайиди, йисар алатунивай Сулейманан шиирри мадни кесерлудаказ ванзавайди, абур обществодин гзаф “азаррикай” хуьдай еке дармандиз элкъвенвайди, СтIал Сулеймана чаз мад сеферда чи дувулриз, чи чешмейриз элкъвена кихлигуниз эвер гузвайди къейдна.
Шаирдин яратмишунрин ва уьмуьрдин рекьиз талукь келимаяр лагьайбурун, Сулеймана теснифнавай, гьакIни зурба камалэгьлидиз бахшнавай шиирар кIелайбурун арада меркездин 5-нумрадин гимназияда чирвилер къачузвай рушар, Дагъустандин дявединни къанун-къайда хуьдай органрин ветеранрин Советдин председатель, отставкада авай полковник М.Алижанов, шаирар — Ш.Алишева, Б.Кулунчакова, Дагъустандин халкьдин писателар — Къ.Акимов, А.Исмаилов, МЧС-дин отставкада авай полковник Н.Исмаилов, шаир ва публицист Ф.Нагъиев ва гзаф масабур авай. Абуру халкьдин тIал-квалрикай, намус-гъейратдикай, инсанвилин ерийрикай теснифнавай адан шиирар такабурлу дагъ, дерин гьуьл тирди къейдна.
“Лезги газетдин” кьилин редактор Мегьамед Ибрагьимов мярекатдал лезги чIалал рахана. Вичин ва коллективдин патай виридаз сувар — Дагъустандин шииратдин ва шаир хайи югъ — тебрикна. Дагъустандин шииратдик еке пай кутур СтIал Сулейман сифте нубатда ягь, намус вине эцигай кас тирди, адан шииррини и кардиз эвер гузвайди къейд авунихъ галаз санал ада йисалай-суз мярекатда иштиракзавай ксарин жергеяр кьери жезвайдал, гьукумдин жавабдар къуллугърин сагьибар и мярекатда тIимил аквазвайдални фикир желбна.
Мярекатдал Мегьамед Ибрагьимовав ва газетдин литературадин отделдин редактор Мердали Жалиловав Россиядин гзаф миллетрин алай аямдин литературадик еке пай кутунай (За значительный вклад в современную многонациональную литературу России) Россиядин писателрин Союздин председатель Н.Иванован къул алай гьуьрметдин грамотаяр вахкана.
Рагнеда Рамалданова
