“Россия — зи тарих” паркуна, 2022-йисуз Государстводин нетижаяр кьадай аттестация кьиле тухуниз талукьарна, вири республикадин диде-бубайрин “Зи аял — выпускник” собрание кьиле тухвана. Собранида гьам очный, гьамни онлайн-къайдада иштиракдай мумкинвал авай.
РД-дин Халкьдин Собранидин образованидин ва илимдин комитетдин председатель Елена Павлюченкоди аялар имтигьан кьиле тухузвай йикъаз психологиядин жигьетдай дуьздаказ гьазурунин важиблувал къейдна.
“Нетижаяр кьадай аттестация абуруз гележегда виликди физ куьмекдай дережайрикай сад я”, — лагьана ада.
2022-йисуз Государстводин нетижаяр кьадай аттестация 19-майдиз башламишда. ЦIи Дагъустанда Государстводин нетижаяр кьадай аттестацияда мектебра кIелзавай тахминан 50 агъзур аялди иштиракда, абурукай 36,5 агъзур — кIуьд лагьай классра кIелзавай аялар ва 13,5 агъзур цIусад лагьай классар акьалтIарнавай жегьилар я.
Малум хьайивал, мектебра къачунвай чирвилерин нетижаяр кьадай имтигьанар кьиле тухунин карда 15 агъзур муаллимди ва технический къуллугъчийри иштиракда. 9-классрин аялри ГИА-дин имтигьанар 73 пунктуна ва 11-классрин аялри 140 чкада вахкуда.
“Нетижаяр кьадай аттестацияди чи уьлкведин гьихьтин хьайитIани пипIерай тир аялриз чпин мурад тир вуздик экечIдай мумкинвал гузва. И йисалай башламишна, документар яргъал мензилда аваз, “Вуздик онлайн-къайдада экечI” сервисдин куьмекдалди агакьариз жезва. Къенин юкъуз чи кьилин месэла жув ва жуван аялар кIвалахдин дуьз къайдада гьазурун я. Гьихьтин гуьгьуьлралди чна абур имтигьанриз рекье твазватIа, гьадалай нетижайрин агалкьунар аслу я”, — лагьана мярекатдал РД-дин образованидин ва илимдин министр Ягья Бучаева.
Министрдин заместителдин везифаяр вахтуналди тамамарзавай Мегьамед Абидова имтигьанар гьахълудаказ, адалатлудаказ кьиле тухунин важиблувал къейдна ва ГИА-дин къайдаяр чIуруни гъун мумкин тир нетижайрикай суьгьбетна.
Выпускникрин диде-бубайриз имтигьанар кьиле тухудай къайдадик кутунвай дегишвилерикай ва 2022-йисан ГИА-дин кьетIенвилерикай чир хьана. Абуру экзаменрин вахтунин стрессдихъ галаз женг чIугунин, и карда аялриз куьмек гунин гьакъиндай психологрин меслятрихъ яб акална.
Министрдин заместитель Аида Далгатовади къейд авурвал, гьазурлухвилин дережадилай аслу тушиз, выпускникрик виридак имтигьанар нетижасуздаказ вахкуниз талукь кичI ква.
“Чна сифте чкадал образованидин рекьяй нетижа ваъ, чи аялрин гьиссерин гьал эцигзава. Чун паталди имтигьанрин вахт куьтягь хьайидалай кьулухъ аялрин сагъламвилиз ва я абурун уьмуьрдиз ганвай зарар амукь тавун важиблу я. Аялар дуьздаказ гьазура, абур, ЕГЭ-дин нетижа гьихьтинди хьайитIани, ам эхиримжиди туширдан, чIуру гьалдай экъечIдай рехъ гьамиша авайдан гъавурда тур. ИкI, месела, СПО-дик экечIиз ва я са йисалай имтигьан мад вахкуз жеда”, — лагьана ада.
«Лезги газет»
