— ДуркIунра къван авайла, кьурурнавай 2-3 инжил са истиканда авай некIеда ргана, гьар юкъуз са истикандавайди, къванер акъатдалди, хъвада. Нек кузвайди хьун лазим я.
— Радикулит авайла, тIал секинарун патал шивитрин тумунин ва шалфей хъчадин гьалимади хъсандиз куьмекда. Ам икI гьазурда: нянилай термосдиз абурукай гьар сад хуьрекдин кьве тIуруна авайди вегьена, 0,5 л ргазвай яд илична, экуьналди тада. Ахпа йикъа пуд сеферда, фу нез 10 декьикьа амайла, хуьрекдин са тIуруна авайди хъвада.
— Ивидин гемоглобин агъуз хьанвайла, нахутIар иллаки хийирлу я. Абур икI ишлемишда: зур истиканда авай кьуранвай харарал са истиканда авай ругунвай яд илична, 8 сятда тада. Ахпа ам як регъведай машиндай авадарда. Арадал атай къаришма йикъа 3-4 сеферда хуьрекдин са тIуруна авайди ишлемишда. Сагъарунин вахт са гьафте я. Герек атайтIа, курс тикрар хъийида.
— Ивидик холестериндин кьадар гзаф хьанвайла, агъадихъ галай рецептдикай менфят къачуда:
50 г расторопша хъчадин тумунал 0,5 л эрекь илична 2 гьафтеда тада. Ахпа йикъа 3-4 сеферда, фу нез 30 декьикьа амайла, зур истикандавай циз 20-25 стIал вегьена, хъвада. И къаришма са вацра ишлемишайдалай гуьгъуьниз холестериндин кьадар къайдадик ахкатда.
— Жалгъайра авай тIал секинарун патал дарчинарни вирт (сад хьтин паяр) сад-садак какадарна, тIазвай чкайривай гуьцIна, сифте целлофандалди, винелайни чими шарфуналди кIевирна, са сятда тада. Ахпа чими цяй кьежирнавай пекиналди михьи хъийида.
— Кьилин мефтIедин дамарар михьи авун патал агъадихъ галай рецептрикай менфят къачуда: 15 йикъан вахтунда гьар экуьнахъ ва нянихъ, фу нез 30 декьикьа амайла, чайдин са тIуруна авай кушунин ягълу ишлемишда.
Мадни чугъундуррин квас иллаки хийирлу я. Ам икI гьазурда: яру чугъундурар михьи авуна, кIусариз пайна 3 литрдин банкадин пудан са пай ацIурна, духовкада кьурурнавай силин са кIус фу, хуьрекдин 1-2 тIуруна авай шекердин песок вегьена, винелай ругунвай чими яд илична, сив жунадалди кIевирна, кIвалин гьавада хуьда. Са пуд йикъалай цин винел куркурар акьалтда, абур, тIуруналди къачуна, гадарда. Са 3-4 йикъалай гьазур хьанвай квас шуьшедин путулкадиз цана, сив хъсандиз кIевирна, холодильникда хуьда. И къаришма фу недалди вилик йикъа 2 сеферда истикандин кьатIа авайди хъвада. Гьазурнавай квас са курс патал бес жеда.
— НекIед хъчадин, паркьулдин дувулрин ва тIенгиррин (мать-и-мачеха) гьалимадини дамарар хъсандиз михьи ийида. Ам икI гьазурда: абур вири сад-садак какадарна (вири сад хьтин паяр), хуьрекдин 2 тIуруна авай къаришмадал 2 истиканда авай ргазвай яд илична, 2 сятда тада. Ахпа са вацран вахтунда йикъа кьуд сеферда, фу недалди вилик, истикандин са кьатIа авайди ишлемишда.
— Хуьрекдин са тIуруна авай яру рябинадин тарцин чкалдал са истиканда авай яд илична, 5 декьикьада ргада. Ахпа ам, пичинилай алудна, 2 сятда тада. Гьалима куьзна, йикъа пуд сеферда, фу нез 30 декьикьа амайла, 1/3 истиканда авайди ишлемишда.
“Айболит” газетдай.
Гьазурайди — Надият Велиева
