Чи ватанэгьлияр — гьар сана

Интернетдин соцсетра Алик  Мегьамедович  Мустафаева  арадал гъанвай “Шадвал” ансамблдиз талукь аккаунтра чапнавай малуматри, шикилри акурбур гьейранарда. Ватанэгьлиди Къазахстанда милли меденият хуьнин, машгьурунин рекье ийизвай крар гьакъи­къатдани лайихлубур я.

Мукьвара зун Аликахъ галаз алакъадиз экъечIна. Ада заз лезгинка кьуьлуьнин “Шадвал” ансамблдикай, кьиле тухузвай кIвалах­ри­кай ва вичикай ихтилатна.

Алик Мустафаев 1981-йисан 15-августдиз Къазахстандин Шевченко (гилан Актау) шегьерда дидедиз хьана. ЦIувад йис жедалди ам Актауда яшамиш хьана. 1996-йисуз Кьасумхуьруьн райондин Герейханован хуьруьн 1-отделенидиз (вичин диде-бубадин ватандиз) хтана ва ина мектебда кIелна.

Кьисметди 1988-йисуз ам мад Ак­таудиз ахкъудна. Шегьерда кара­тэдал, лезгинка кьуьл авунал машгъул хьана. Къазахстандин Ман­гис­таудин атомный энергокомбинатда жуьреба-жуьре пешейрай кIвалах­на­. Адан хизанда пуд велед чIехи жезва.

Уьмуьрдин шартIари спортдин рехъ гадаруниз мажбурнатIани, мил­ли кьуьлуьнал машгъул хьунин гьевес са кIусни зайиф хьанач. 2003-йисуз ада лезгинка кьуьл чирдай студия-кIватIал тешкилна, и ре­­кьяй ма­сабуруз тарсар, вердишвилер гана.

А.Мустафаева 2012-2015-йисара Б.Мурадовадин тIварцIихъ галай Дагъустандин медениятдин ва искусстводин колледжда заочнидаказ кIелна.

Ватанэгьлидиз 2009-йисуз Къазахстанда авай лезги карчийри —  Жи­герхан Сулейманова, Зарета Фа­талиевади, Феликс ва Багъир Жа­ватоври, Азиз Зибилаева ва Лукьман Мурадагъаева “Шадвал” ансамбль кIвачел акьалдарунин карда куьмекар гана.

“Лезгинкадал зун 1999-йисалай машгъул я, тарсар гунив 2003-йисалай эгечIна, ансамблдиз “Шадвал” тIвар за 2008-йисуз гана. 2023-йисуз чаз ансамблдин бине кутурдалай инихъ 20 йис тамам хьуниз талукь яз юбилейдин гегьенш концерт кьиле тухудай къаст ава. Къейд ийиз кlанзава, исятда чна кьуьлер чирзавай зал Жигерхан Сулейманова вичин патай чара авунва, яни за киридин гьакъи гузвач”, — ихтилатзава Алик Мустафаева.

Къейд ийин, ватанэгьлийри къаюмвал авурдалай кьулухъ 2009-2010-йисара “Шадвал” ансамбль машгьур хьана.

Заз малум хьайивал, “Шадвили” шегьердин, областдин, гьатта рес­публикадин медениятдин ге­гьенш мярекатра иштиракзава. Медениятдин конкурсра гьамиша гъалиб жезва, алатай йисара гран-при къачуна, областдин “Йисан ансамбль” конкурсда гъалиб хьана.

“Алай вахтунда “Шадвал” ансамблда 200-далай (абурукай чIехи пай чи кьуьлерал рикI алай къазахар я) гзаф аялар машгъул жезва. Абуруз кIвалахдин рекьяй еке алакьунар авай 4 муаллимди чирвилер гузва. Репертуардик 12 кьуьл ква. 2018-йисуз чна гегьенш кьве концерт гана”, — ихтилат ­давамарзава ансамблдин регь­берди.

Къейд авурвал, мукьвара ада Къазахстандин Атырау (виликан Гурьев) шегьерда кьуьлер чирдай кьвед лагьай мектеб — “Лекия” ахъай­нава.

Вичин ансамблдиз регьбервал гунилай гъейри, ада кьуьлерал машгъул жезвай маса ксаризни студияр ачухунин ва методикадин рекьяй алакьдай куьмекар гузва, мастер-классар къалурзава.

2018-йисуз РД-дин медениятдин министр З.Бутаевади Алик Мус­тафаеваз милли медениятдин рекье санал кIвалахуник,  къецепатан уьлквейра милли алакъаяр еримлу авуник, Дагъустандин халкьарин адетар хуьник ва раижуник пай кутунай гьуьрметдин грамота гана. Агалкьунриз, гъалибвилериз килигна, ансамблдинни адан регьбердин тlварцlихъ кхьенвай шабагьрин кьадар гзаф я.

“Шадвал” ансамблди Дагъустанда концертар гузвачни лагьана хабар кьурла, Алика заз ихьтин жа­ваб гана: “Дагъустанда са концертни ганвач. Садра чи ансамблдиз Ахцегьа кьиле физвай “Шарвили” суварик теклифнай. Амма а йисуз коронавирусдин тIугъвалди гьужумуникди кьисмет хьанач. Белки, нубатдин суварик иштиракдай мумкинвал жен чаз”.

Къазахстанда “Шадвал” хьун шад жедай кар я. Чаз Аликахъ кIва­лахда еке агалкьунар хьана кIан­зава. Къуй чи ватанэгьлийри, гьина аватIани, бахтавар уьмуьр кьиле тухурай.

К.Ферзалиев