Ватандал хаинвилелди вегьей душман кукIварун патал фронтдиз рекье гьатайбурун жергеда лейтенант Ших Мамедьяровни авай. Дагъдин стрелковый 305-полкунин ротадин командир тир ам 1917-йисуз Ахцегь райондин Чеперин хуьре дидедиз хьана. 1935-йисалай Яру Армиядин жергейра аваз хьайи Ш.Мамедьяров къуллугъдилай кьулухъ кIелун патал пияда кьушунрин училищедиз рекье туна. Ада анаг 1939-йисуз куьтягьна.
Ших Мамедьярова 44-дивизиядин жергейра аваз 1939-1940-йисарин советринни финнрин дяведа иштиракна. 1940-йисуз ам 305-стрелковый полкунин ротадин командирвиле тайинарна. Ватандин ЧIехи дяведа ада гьа сифте йикъарилай иштиракна. Женгинин гьерекатар кьиле физвай вахтунда адакай дагъдин стрелковый 44-дивизиядин штабдин 2-отделенидин начальникдин куьмекчи хьана. Умань шегьердин мукьув душмандин гьалкъада гьатайла адалай са шумуд аскердихъ галаз анай экъечIиз алакьна. Идалай кьулухъ Ш.Мамедьярова душмандиз акси женгера иштиракун давамарна. 1941-йисан декабрдиз адал кьезил хер хьана.
1943-йисуз Ш.Мамедьяровакай 30-стрелковый корпусдин Яру пайдах авай Бахмачский гвардиядин 231-стрелковый дивизиядин 1-стрелковый батальондин командирдин заместитель, гвардиядин капитан хьана. Гьа и йисан сентябрдин эхирра йифиз Днепр вацIалай элячIдайла ва душмандин гьужумриз рум гудайла ада игитвилин чешнеяр къалурна. И женгера иштиракунай ам женгинин Яру Пайдахдин ордендиз лайихлу хьана. 1945-йисуз Ших Мамедьяров Яру Пайдах авай Верхнеднепровский 362-стрелковый дивизиядин 1206-полкунин кьилдин батальондин командирвиле тайинарна.
Гьайиф хьи, викIегь офицердиз ЧIехи Гъалибвилин югъ акун кьисмет хьанач. Ватандин ЧIехи дяве куьтягь жедалди са шумуд варз амаз ам 1945-йисан 31-январдиз душмандихъ галаз хьайи къати женгина игитвилелди телеф хьана. Уьлкведин азадвал патал чан гайи чи районэгьли, капитан Ших Мамедьяров Германиядин Вибуз шегьердин мукьув гвай Биркхольц хуьре кучукнава. (Дагъустандин рикIел хуьнин ктаб).
Нариман Мамедов
