Россиядин Федерациядин вири регионра 9-Майдиз ЧIехи Гъалибвилин 77 йис тамам хьуниз талукьарнавай мярекатар ва 28 шегьерда военный парадар, “Рекьин тийир полк” мярекат кьиле тухвана. Дагъустан Республикада военный парад кьвед лагьай сеферда Каспийск шегьерда тешкилна.
Шегьердин гегьенш майдан Каспийскдин флотилиядин, Махачкъаладин гарнизондин, къаравулрин 177-полкунин, мотострелковый 136-бригададин офицерри, аскерри, пограничный, МЧС-дин управленийрин, Дагъустандин таможнядин дестейри, дишегьлийрин ротади, Юнармиядин жаванри, пайдахар, цуьквер гвай, хуруйрал Георгиев лентер алкIурнавай шегьерэгьлийри, мугьманри, аялри кьунва. Виридаз аквадай чкадал Дагъустан Республикадин Кьил Сергей Меликов, Ватандин ЧIехи дяведин ва далу патан зегьметдин ветеранар, генералар, РФ-дин ГД-дин, РД-дин Халкьдин Собранидин депутатар, РД-дин Гьукуматдин членар ацукьнава. Военныйрин оркестрди маршар язава.
Майдандик юзун акатна. Яру Пайдах авай Каспийскдин флотилиядин офицерри Гъалибвилин ва Россиядин Федерациядин пайдахар гваз майдандилай цIар элкъуьрна. Ахпа параддин кьиле акъвазнавай контрадмирал Анатолий Долговавай Каспийскдин флотилиядин штабдин начальник, контр-адмирал Николай Якубовскийди парад кьабулна. Дикторди майдандал кьиле физвай гьар са гьерекатдикай малумарзава, Ватандин ЧIехи дяведа Гъалибвилик дагъустанвийри кутур пай гьикьван метлеблуди ятIа, лугьузва.
Майдандал эцигнавай чIехи экрандал чан атана. КIватI хьанвайбуруз анай Россиядин Федерациядин Президент Владимир Путинан тебрикрихъ, рахунрихъ яб акалдай мумкинвал хьана.
Региондин агьалийриз, аскерриз, морякриз, офицерриз, ветеранриз Гъалибвилин 77-сувар тебрик авунихъ галаз сад хьиз РД-дин Кьил Сергей Меликова лагьана:
— Чи чилел ислягьвал атайдалай инихъ 77 йис алатнава. Чна къени гьар са кардай гъалибвилелди экъечIдай мумкинвал яратмишзавай ватанпересвал гьиссзава, чаз гъалибвал багъишай несилдиз баркалла лугьузва. Телеф хьайи виридахъ яс чIугвазва.
Къе 1945-йисан Гъалибвилин чешмейрихъ элкъуьнихъ, ХХ асирдин тарихдин лап зурба вакъиадин ивирриз ва тарсариз дуьзгуьн къимет гунихъ мадни еке метлеб ава. Алай аямда дуьньяда арадал атанвай гьалара Россияди хкянавай дуьз рекьиз вафалувал къалурун важиблу я. Дуьньяда агъавал ийиз кIанзавай нацистрин мурадар анжах чи уьлкведи чIурайди, “пуд лагьай рейхдин” военный машин барбатIайди гьамиша рикIел хуьн лазим я.
Анжах чи халкьди, чан эцигна, Ватандин аслу туширвал, азадвал хвена, Европа фашизмдикай азадна. Гзаф кьадарда къурбандар хьанатIани, инсаниятдиз ислягьвал гъана. Гъалибвал патал миллионралди инсанри чпин чанар къурбандна.
Чна къе къизгъин женгера телеф хьайибурун, душмандин концлагерра кьейибурун, далу пата югъди-йифди зегьмет чIугурбурун руьгьериз, юкь агъузна, икрамзава, абурухъ яс чIугвазва. Эхь, абуру Ватан хвена, несилриз бахтлудаказ ислягь уьлкведа яшамиш жедай мумкинвал яратмишна. Эхиримжи цIуд йисара дуьньяда хейлин дегишвилер арадал атана. Гъалибвал рикIе хуьни, ам ахлакьдин, марифатдин зурба чешме хьиз кьуни чи халкьар мадни къуватлу ийизва.
Гьайиф хьи, вирида тарихдин тарсар рикIел хуьзвач. «Тапаррин империя» лугьудай къуватри тамам халкьар милливилин бинейрикай магьрумзава, къундармаяр туькIуьруналди, тарихдик синихар кутаз алахъзава. Къе фашизмдихъ галаз женг чIугунин тарихдин рехъ давамаруналди, Россияди Украинада кьиле тухузвай военный махсус серенжемда чи Ватандал гьужум авунин чIуру мурадар авайбурухъ галаз женг чIугвазва. Аскервилин жуьрэтлувал, къагьриманвал къалуруналди, чи аскерри уьлкведин хатасузвал хуьзва. Лугьун лазим я хьи, лап гьа сифте жергейра Дагъустандин рухваярни ава. Абур халис аскерар я.
Россиядин подразделенийрин женгинин руьгь хкажзавай кьилин ярж Ватандин ЧIехи дяведа Гъалибвилин Пайдах я. 77 йис алатайлани, стрелковый 150-дивизиядин полкар Пайдахни гваз женгера ава. Виликан ветеранрин, гъалибчи несилдин рухвайри, хтулри, птулри къе Донбасс, Украина фашистрин жаллатIрикай мад сеферда азадзава. Чи рухвайри викIегьвилелди женг чIугвазва. Абур чпи ийизвай кар гьахълуди тирдахъ инанмиш я.
Рахунрилай гуьгъуьниз майдандилай оркестрдин музыкадин ва “Гъалибвал” манидин сесерик кваз военный техникади (минометный, ракетайрин комплексар, МЧС-дин техника, военный махсус машинар…) гьерекатна.
И юкъуз Дагъустандин вири шегьерра ва районра “Рекьин тийир полк” акция кьиле фена ва ада санлай къачурла 135 агъзур касди иштиракна.
Хийир Эмиров
