Мукьвара ахцегьвийрив чIулав хабар агакьна: Украинада кьиле физвай махсус операцияда Ватандин вилик вичин буржи тамамардайла, Ахцегьрин хуьряй тир Тамерлан Нариманович Ильясов телеф хьана.
Тамерлана куьруь, амма жуьреба-жуьре вакъиайрив ацIай уьмуьр кьиле тухвана. Жегьилдин анжах 21 йис тир.
2020-йисуз Москвада высшее общевойсковое училище акьалтIарай дагъвидиз лейтенантдин чин гана ва ам Брянскдин областдин Клинцы шегьердиз рекье туна. Ина жегьил офицерди кьушунрин 12721-нумрадин частуна къуллугъзавай. Чешнелудаказ къуллугъ авунихъ галаз санал Тамерлан спортдални машгъул жезвай: боксдай, гъутаралди кукIунай областдин, регионрин, международный дережада аваз кьиле физвай акъажунра кIвенкIвечи чкаяр кьазвай.
Украинада махсус операция гатIунай чIавузни чи кьегьал ватанэгьли нубатдин акъажунра авай. Гъалибвал гваз хтай Тамерланаз вичихъ галаз санал къуллугъзавайбур Украинадиз фенвайдакай хабар хьайила, ам, викIегь, жавабдар, намуслу офицер, хайи Ватан экстремистрикай, миллетчийрикай хуьз гуьгьуьллудаказ рекье гьатна. Махсус операция кьиле физвай чIавуз къалурай агалкьунар фикирда кьуна, адал мотострелковый батальондин ротадин мотострелковый взводдин командирдин везифаяр ихтибарна.
Гьайиф хьи, дяведин майданра кьиле фейи нубатдин женгина кьегьал лезги хцихъ душмандин гуьлле галукьна. Тамерлан телеф хьана лагьай хабарди ам чидайбур вири къарсурна. Танишри, санал къуллугъ авур юлдашри, ахцегьви лейтенант зирек, гьамиша кIвенкIве жергейра авай, кар алакьдай офицер хьиз рикIел хкизва. Вичин игитвилелди ада махсус операцияда иштиракзавай виридаз жуьрэтлувилин, ватанпересвилин чешне къалурна…
Тамерлан адан багърийрин, санал къуллугъай юлдашрин, ярар-дустарин, чирхчиррин рикIерай садрани акъатдач.
“Лезги газетдин” редакциядин коллективди, Ахцегь райондин администрацияди, райондин собранидин депутатри Тамерлан Ильясован диде-бубадиз, хизанриз, вири мукьва-кьилийриз, дериндай хажалат чIугунивди, башсагълугъвал гузва.
«Лезги газет»
