Хипехъанвал Дагъустандин агрокомп­лекс­дин кар алай хилерикай сад я. 2022-йисан 12-апрелдиз Ахцегь райондин хуьруьн майишатдин управленидин начальник Арген Гьажиев УСХ-дин пешекарарни галаз лапагри кьуьд акъудзавай Кочубейдин къишлахрал чубанриз мугьман хьана. “Хизан”, “Луткунский”, “Южный” СПК-ра абуру чубанрин гьал-агьвал, яшайишдин шартIар, къайгъуяр ахтармишна. Къейд ийин, алатай йис Кочубейда малдарар патал къулайди хьана.

Санлай къачурла 2021-2022-йисара ­Ахцегь райондин вири жуьрейрин майишатра куьчери малдарвилин чилерал 28 520-далай артух хипери ва цIегьери, гьакIни ири карч алай 5 агъзурдав агакьна малари кьуьд акъудзавай. 2022-йисан 12-апрелдин де­лил­ралди, 100 процентдин дул къачунва. Алай вахтунда райондин малдарвилин майи­шатра хиперилай гатфарин сар тваз башламиш­нава.

Кьилди къачуртIа, “Хизан” СПК-да йи­къа юкьван гьисабдалди 200-250 гьай­вандилай сар твазва. И кIвалах райондин амай ма­йи­шатрани тешкиллудаказ кьилиз акъуд­­зава. Райондин майишатри санлай къачурла 85 560 тонндив агакьна сар къачун планламишнава. Яйлахриз хкуниз ­гьазурвал акун яз, сар турдалай кьулухъ гьай­ван­риз герек тир дарманар яда, абур ­ккI­лам­рикай ва маса хаталу гьашаратрикайни азаррикай хуьн патал дарманрин (купкадин) ятарай акъудда. Важиблу и серенжем чубанри йиса 2 сеферда кьиле ту­хузва.

Гьайванар къишлахрай яйлахриз куьчариз 15-майдилай башламишда.  И кар патал махсусдаказ туькIуьрнавай пар чIугвадай машинар ишлемишзава. Гьайванар машинриз  ягъун ва авудун патал махсус гъвечIи майданар, винелай янавай къатар ишлемишзава. Хиперин суьруьяр хуьнин ва артмишунин мураддалди малдарри ийизвай харжийрин тайин тир пай арадал хкун патал гьукуматди субсидияр гузва.

Дашдемир Шерифалиев