Сив хуьнин суварин вилик гьар йисуз Махачкъалада, Дуствилин КIвале, Дагъустандин Муфтиятди мергьяматлувилин “Инсан” фондунихъ, РД-дин милли сиясатдин ва динрин крарин рекьяй министерстводихъ галаз санал аялриз шад гьалара сувар тебрикун хъсан адетдиз элкъвенва. Аниз етим, дуланажагъдин четин шартIара яшамиш жезвай хизанрай тир аялриз, аялрин кIвалера чIехи жезвайбуруз теклифзава.
Мярекатда РД-дин милли сиясатдин ва динрин крарин рекьяй министр Энрик Муслимова, Дагъустандин Муфтий шейх Агьмад Афандиди, РД-дин аялрин ихтияррин рекьяй уполномоченный Марина Ежовади, Муфтийдин меслятчи Айна Гьамзатовади ва масабуру иштиракна. Ам журналист Мугьаммадрасул Абакарова, сувариз хас тирвал, конкурсар тешкилуналди, пишкешар гуналди абурлудаказ, аялрин рикIера яргъалди амукьдайвал кьиле тухвана.
Сувар тебрик авур Айна Гьамзатовади Рамазандин варз мусурманриз Аллагь-Таалади ганвай еке савкьат тирди къейд авунихъ, аялрихъ элкъвена, чими келимаяр лугьунихъ галаз сад хьиз, Мугьаммад Пайгъамбардилай (къуй Аллагьдин патай салават ва саламар хьурай вичиз) чав сунна яз агакьнавай суварин кьетIенвилерикайни, алай вахтунда Украинада Россияди кьиле тухузвай махсус серенжем фад акьалтIун, ана иштиракзавай чи ватанэгьлияр сагъ-саламатдиз хтун мурад тирдини лагьана.
Министр Энрик Муслимова Дагъустандин Кьил Сергей Меликован тIварунихъай Тебрик кIелна ва министерстводин коллективдин патай сувар мубаракна. Рамазандин вацра чи республикадин гьар са пипIе кьиле тухвай ифтарри, хъсанвал ийиз чалишмиш жезвай ксарин кьадар йисалай-суз артух хьуни Дагъустанда Мугьаммад Пайгъамбардин (къуй Аллагьдин патай салават ва саламар хьурай вичиз) рехъ абурлудаказ давамарзавайди мад сеферда субутзавайди, аник Муфтий шейх Агьмад Афандидин лайихлу пайни квайди къейдна.
Сегьнедилай, аялрихъ элкъвена, чими келимаяр Марина Ежовадини лагьана:
— Къе вири сад-садал ацалтнава — гуьзел балаяр, Сив хуьнин пак ва михьи сувар. Ам неинки диндин, гьакI хизандин, къени ва рикIе чими гьиссер тазвай суварни я. Ихьтин келимаяр ава: вири миллетрин ва динрин дидеяр сад хьтин накъваралди шехьзава. Чун гьар сад са жуьре я, амма жуван бахтлу балаяр акурла, виридан вилерал накъвар акьалтзава. Къуй гьар са дидедин вилерай, вичин сагълам, гуьрчег, бахтлу балаяр акваз, шадвилин накъвар атурай! Къуй виридан кьилел михьи ва экуь цав хьурай! Квез сувар мубаракрай!
Гуьгъуьнлай рахай “Инсан” мергьяматлувилин фондунин директорди чпи суварин тешкилатчийриз анжах куьмек гузвайди, ихьтин серенжемрин макьсад аялрин уьмуьр шадарун тирди къейдна.
Сувар аялрин “Умрахадж” ансамблди тамамарай нашидри, Юсупован тIварунихъ галай “Ватан” школадин аялри къалурай сегьнейри мадни гуьрчегарна. Эхирдай вири аялриз суварин паяр гана.
«Лезги газет»
