И йикъара Мегьарамдхуьруьн районда Советрин Союздин Игит Абас Исрафилован тlварунихъ галай ДЮСШ-да азаддиз кьуршахар кьунай райондин кlвенкlвечивал патал акъажунар кьиле фена. И гьакъиндай «Лезги газетдиз» райадминистрациядин пресс-къуллугъди хабар гузва.
Ватандин Чlехи дяведин 73 йисаз талукьарна кьиле тухвай акъажунра 2004-2005-йисара дидедиз хьайи жегьил спортсменри иштиракна.
Къизгъин акъажунра гьар са жегьилди вичин алакьунар ва гъалибвилихъ авай майилвал къалурна. Нетижада хъсан чкаяр кьур иштиракчияр тайинарна. Ярумчух женгер, турнирдин программадал асаслу яз, Гъалибвилин юкъуз райцентрдин майдандал кьиле фида.
«Лезги газет»
