12-апрелдин экуьнахъ АгъастIал-Къазмайрин аялрин “Чубарук” бахчадин заведующий Рена Фахрудиновна Рагьмановади зазни СтIал Сулейманан райондин образованидин управленидин начальникдин заместитель Аминов Къачабег Аминовичаз аялрин бахчадиз мугьман хьун теклифзавай хабар атана. Заз ван хьайивал, ам райондин лап хъсанбурукай сад я.
“Чубарукдиз” мугьман хьун зи фикирда фадлай авайди тир. Идакай за Къачабег Аминовичазни хабар ганай.
Тайинарнавай юкъуз зун Кьасумхуьрел атана. Амма Къачабег Аминовичаз маса дердияр акъатун себеб яз, бахчадиз зун кьилди фидайвал хьана. Анив агакьдайла, заз гьеле яргъалай кьве гьавадин иер дарамат акуна. Ам патав гвай кIвалерикай хкатна чир жезвай. Зун гьаятдиз гьахьна. Хъсан михьивал авай ина аялар къугъвадай 6 майдан ава. Гьар са майдандал серинардай къавни ала. Аялрин гьар са дестедиз вичин кьилдин майдан ава. Абур къекъведай рекьера иер плитка тунва, амай чкайра цуьквер цанва, тарар, къацу чIур акъатна гуьрчегдиз аквазва. Аялрин бахчадин чилел 0,5 гектарда шуьмягъдин багъ, парник ава. Парникда цазвай къацу хъчар хъуьтIуьз аялриз гузвай хуьрекрик кутазва, тIуьнриз хъсан атирдин тIям къвезва.
Дарамат цIийиди я. Ам 2015-йисан 1-сентябрдиз ишлемишиз вахкана. Ина 120 аялдиз чкаяр ава. Алай вахтунда ам тамамдаказ ацIанва. Аялрин бахчада музыкадинни спортдин залар, методикадин, логопеддин кабинетар, тIуьнар гудай блок ава. Виринра хъсан мебель эцигнава.
Бахчада вири 6 десте ава. Аялрихъ галаз 44 къуллугъчиди кIвалахзава. Абурукай 16 педагогар я — 10 тербиячи ва тарсар гузвай муаллимар (логопед, физинструктор, музыкадин сирер чирзавайди, хореограф, педагог-психолог).
Аялрин бахчадин гьаятдиз гьахьайла, зи вилик юкьван яшдин са итим атана. Ада зун аялрин бахчадин дараматдиз гьахьзавай ракIарин патав тухвана. И арада зи вилик аялрин тербиячи ва зи дуст Надир Алисултанован руш Халилова Заира Надировна, ахпа са декьикьадилай бахчадин заведующий Рена Рагьманова акъатна. Заиради зун заведующийдихъ галаз танишарна.
Рена Фахрудиновнади вичин везифаяр бахча кардик кутур чIавалай кьиле тухузва. Ихтилатар ийидайла, зун Рена Рагьманова вичин везифаяр лап хъсандиз чизвай, гзаф йисара аялрихъ галаз кIвалах авунвай кас, чIехи коллективдин регьбер тирдан гъавурда гьатна.
1999-йисуз ДГПУ-дин филологиядин факультет акьалтIарайдалай гуьгъуьниз Ренади гзаф йисара СтIал Сулейманан райондин ЦIийи поселокдин, Агъа СтIалрин школайра кIвалахна, урус чIалан тарсар гана. Ам “Дагъустан Республикадин образованидин отличник” лагьай тIварцIин сагьиб я.
Чун аялар авай залдиз фена. Ина алай йисуз школадиз фена кIанзавай аялрин десте авай. Абур шаир Пакизат Фатуллаевадин “Пси- пси псайди” ктабдай сегьне къалуриз гьазур хьанвай. И кар абуру лап артистри хьиз кьиле тухвана. Гуьгъуьнлай Рагьманова Асиятани Султанов Зугьраба кьуьл авуна. Макьамдин ван хьанмазди, Зугьраба, лекьре хьиз, гъилер хкажна, кьуьл ийиз башламишна.
Идалай кьулухъ аялри “Пси-пси псайди” ктабдай шиирар кIелна. Шагьламазова Сефижата — “Вах”, Рагьманова Асията — “Къайибуба”, Гьажимурадов Ильгьама “Куьмекчи” шиирар хъсандиз кIелна. Эхирдай аялрин хорди “Лезгистан” мани лагьана.
Аялар Заира Халиловади ва Зинаида Агьмедовади гьазурнавай. Кьуьл эцигай хореограф Индира Рашидова тир.
Лагьана кIанда, бахчада вири дестейрин аялрихъ галаз тарсар лезги чIалал тухузва. КIелиз, кхьиз чирун аялрин бахчадин программадик квач. Аялриз лезги ва урус чIалар чизва.
Заз Рена Фахрудиновнадин регьбервилик кваз зегьмет чIугвазвай коллективдин кIвалах кьетIендиз къейд ийиз кIанзава. Аялриз лезги халкьдин адетар, манияр, кьуьлер, чIал чирунал зун гзаф шад я. Аялрик лезги руьгь кутазва, чи бубайрин крар давамардай гъвечIи лезги балаяр чIехи жезва. КIанзавайди ислягьвал хьун я.
Аялрин “Чубарук” бахча Вирироссиядин, республикадин ва райондин дережадин хейлин конкурсрин гъалибчи я. ИкI, Вирироссиядин майданда кьиле тухвай “Аялрин чешнелу бахча -2017”, “Мектебдиз фидалди аялар гьазурзавай образованидин тешкилат — 2018” конкурсра ада гъалибвал къазанмишна. Райондин аялрин бахчайрин арада кьиле фейи “Йисан тербиячи” конкурсрани и коллективди 2016, 2017, 2019, 2022-йисара сад лагьай чкаяр кьуна. 2019-йисуз республикада кьиле фейи “Йисан тербиячи” конкурсдин “Музыкадин палитра” номинацияда сад лагьай чка кьуна. Рена Фахрудиновнадин кабинетдин цлал са кьадар маса конкурсрани гъалиб хьайиди тестикьарзавай грамотаяр ала. Мярекат куьтягь хьайила, за аялрин бахчадиз, жуван патай пишкеш яз, Пакизат Фатуллаевадин “Лезги халкьдин махар” ктаб багъишна.
Мадни еке агалкьунар хьурай “чубарукрихъ”!
Масуб Магьмудов
