Алатай вацран эхирра Санкт-Петербургда боксдай дуьньядин чемпион Николай Валуеван призар патал 15-16 йисарин яшда авай жаванрин арада ачух турнир кьиле фена. Ана и шегьерда 567-нумрадин школада 7 “а” классда кIелзавай, тренер Валерий Елисееван гъилик вердишвилер къачузвай Замир Алибегова 1-чка кьуна, ам Валуеван кубокдиз лайихлу хьана… Мартдин сифте кьилера Замира боксдай Санкт-Петербургдин кIвенкIвечивал патал акъажунра 2-чка кьунай.
З.Алибегов 2007-йисуз СтIал Сулейманан райондин ДаркIуш-Къазмайрал дидедиз хьана. 1-классдилай ада Санкт-Петербургда кIелзава. Боксдин секциядиз физ 4 йис я. Адалай вилик лагьайтIа, чи ватанэгьли женгинин самбодай, къайдаяр авачир бягьсерай секцийриз фена.
Чи гадайри, уьлкведин гьи пипIе аваз хьайитIани, чеб викIегьдиз, Шарвилидин невеяр хьиз тухун шад жедай кар я. Къуй чи гъвечIи ва чIехи ватанэгьлийри чи рикIер датIана шадаррай.
Эйзудин Сайдумов
