Элкъвей столдихъ
25-апрелдиз “Лезги газетдин” редакциядин конференцийрин залда “Ким” тешкилатдин кьил, программист Эмран Гьуьсейнова лезги чIала авай гафарин умуми электронный база арадал гъунин месэладиз талукь яз теклифнавай мугьманрихъ галаз элкъвей столдихъ веревирдер авуна.
Ана алим, чирвилер гудай са жерге ктабрин автор Шайдабег Мирзоева, Дагъустандин халкьдин писатель, “Самур” журналдин редактор Абдуселим Исмаилова, “Лезги газетдин” кьилин редактор Мегьамед Ибрагьимова, общественный деятель Сефижат Мегьамедрасуловади, Р. Гьамзатован тIварцIихъ галай милли ктабханадин къуллугъчи Секинат Мусаевади, лезги радиодин къуллугъчи Сергей Абумуслимова, Куругъли Ферзалиева ва студентри иштиракна.
Иштиракчийрихъ элкъвена, Э.Гьуьсейнова вич кьиле авай тешкилатдин векилри телефонрин куьмекдалди ишлемишиз жедай электронный гафаргандин приложение арадал гъанвайдакай, алай аямдин мультфильмаяр лезги чIалаз таржума авунин кIвалах гъиле кьунвайдакай ихтилатна. Ада гафарин сад тир база арадал гъунин эвелимжи камарикай, кьилди къачуртIа, интернетдин портал арадал гъанвайдакай, и важиблу кардик къуьн кутадайбур, хъсан теклифарни меслятар гудайбур герек тирдакай лагьана. Адан гафаралди, РАН-дин Дагъустандин федеральный ахтармишунрин центрадин векилри алфавитдин къайдада тунвай гафарин кIватIалдин электронный вариант вуганва.
“Квез и мярекатдиз теклиф авунин кьилин макьсад ам я хьи, чаз чIалан пешекаррин, хайи чIалал яратмишзавай ксарин фикирар чир хьун важиблу я. Арадал гъиз кIанзавай сад тир базада чаз жезмай кьван чи чIала авай вири гафар, гьа жергедай яз нугъатринбурни, кIватIиз кIанзава”, — лагьана Э.Гьуьсейнова, мярекатдин макьсаддикай ихтилатдайла.
Иштиракзавайбуру «Ким» тешкилатди гъиле кьунвай кар къенин девирда герекди, важиблуди тирди къейд авунихъ галаз сад хьиз, хъсан меслятарни гана. Лезги чIала идалай виликни, къенин юкъузни ишлемишзавай бязи гафар акъудунин гереквал ава лугьузвайбурун ихтилатрихъ са бинени авачирди, ахьтинбуруз яб гун герек туширди лагьана.
ЧIалаз талукь проектар кьилиз акъуддайла, иштиракчийри анжах алимрин кIвалахрал, гафарганрал амал авуниз эвер гана. ЧIал тIебии затI я, анай, сад-вад касдиз кIан хьуналди, гафар акъудиз хьун гьич мумкин кар туш.
Алим Шайдабег Мирзоева къейд авурвал, чахъ Мегьамед Гьажиев, Унейзат Мейланова, Агьмедуллагь Гуьлмегьамедов, Ражидин Гьайдаров… хьтин алимар хьана. Чпин девирда абуру, кар алай месэлаяр веревирддайла, атIай гаф лугьудай. Артухан гафар лугьудайбур амукьдачир. Кхьинрин къайдайрин патахъайни гьакI я, и месэлаяр орфографиядин комиссияди гьялдай. Гилани, чIалан месэлаяр гьялдайла, илимдин дережа авай, чIалан рекьяй пешекарар тир ксари чпин гаф лугьун чарасуз я.
Эхирдай Э.Гьуьсейнова хъсан меслятар къалурунай, элкъвей столдихъ веревирдер авунай вирибуруз сагърай лагьана.
К.Къалажухви
