Дагъустан Республикадин информациядин ва печатдин Агентствода Ватандин ЧIехи дяведа телеф хьайибурун, гел галачиз квахьайбурун гелер жагъурзавай “Кавказ” тIвар алай дестедин векилрихъ галаз пресс-конференция кьиле фена.
Россиядин гел жагъурзавайбурун гьерекатдин региондин отделенидин правленидин председатель Хайбулла Умарова лагьайвал, Дагъустандин дестедик 150-дав агакьна жегьилар ква ва абуру гьар йисуз апрелдин, майдин, июндин варцара фашистрихъ галаз лап къизгъин женгер кьиле фейи Кеферпатан Кавказдин ва Россиядин областра жагъур хъувунин кIвалахра иштиракзава.
— Тарихдай чизвайвал, Кеферпатан Кавказдин са бязи шегьерар, хуьрер хуьн ва азадун патал чилелни, цавани женгер кьиле фена. Дагъустандин цавани гьахьтин женгер хьайидакай виридаз чизвач. И кар къе субут хьанва. Къизилюрт райондин Пятилетка хуьруьн патарив чаз 1942-йисуз аватай самолетдин амукьаяр жагъанва. Ам чилин къатарай акъудун патал пуд югъ герек атана. Чав агакьнавай малуматрай, Махачкъаладин, Хасавюртдин цава са шумудра душмандин мессершмитар ва бомбаяр авай самолетар пайда хьайиди я. Чибурун ругуд самолет чилел аватна. Гила чаз абурукай сад жагъанва.
Чна Ингушетиядин гел жагъурзавайбурухъ галаз сих алакъаяр хуьзва,- къейдна Х.Умарова. — Абуру лагьайвал, Валентин Эмирован самолет аватнавай чка малум хьанва. Гъалибвилин суварин вилик Аличукда Валентин Эмироваз талукьарнавай мемориал ачухдайвал я. И кардик энергетикадин колледждин коллективди еке пай кутунва. Мярекатда иштиракиз республикадин гьукуматдин векилриз, ветеранриз, чазни теклифнава.
Малум хьайивал, архиврин документрай аквазвайвал, Советрин Союздин Игит лагьай тIвар гун патал 50-далай виниз дагъустанвияр къалурнавай. Гьайиф хьи, жуьреба-жуьре себебралди абурув и чIехи шабагь агакьнач. Гел жагъурзавайбуру и месэладални кIвалахзава. Абурун фикирдалди, ихьтин гьахъсузвал туькIуьр хъувуна кIанда. Фашистар барбатIун, Ватан хуьн патал тежер хьтин игитвилер къалурай ксарин лайихлувилер гьакI квадарун дуьз жедач.
Хийир Эмиров
