1-апрелдиз центральный телевиденидай махсус серенжемда жегьил капитан Руслан Агьмедова игитвал къалурайдакай ихтилатна. Са жуьредин шак атайвиляй зун ам вуж ва гьинай ятIа чириз алахъна.
Кьасумхуьруьнви чирхчирди заз Руслан Агьмедов Кьурагь райондин военный комиссар хьайи подполковник Мегьамеднабидин хва тирдакай лагьана. Мегьамеднаби захъ галаз таниш я. Ада СтIал Сулейманан райондин военный комиссариатдани кIвалахайди я. Алай вахтунда ам Дербент шегьерда яшамиш жезва.
Мегьамеднаби 1963-йисан январдиз Кьурагь райондин Ахнигрин хуьре дидедиз хьана. Дах Лямет колхоздин чубан тир, дидедини колхозда кIвалахзавай. Абуруз 7 аял авай — 4 рушни 3 гада. Мегьамеднабиди 1970-1974-йисара сифтегьан школада кIелна. Ахнигрин хуьр Белиждиз куьч хьана. 1974-йисуз диде, 1975-йисузни дах рагьметдиз фена.
Шейриха эмеди Мегьамеднаби Баку шегьердиз тухвана ва школа-интернатдик кутуна. Ина 8-класс куьтягьайла, ам чIехи стха Мегьамеда вичин кIвализ Белиждиз хкана. Поселокдин юкьван школа гимишдин медалдалди куьтягьай Мегьамеднаби Тюмень шегьердин военно-инженерный высший командный училищедик экечIна. Ина хъсандиз кIелзавай курсант КПСС-дин членвиле кьабулна. Яру диплом къачуналди училище куьтягьай ам гьана туна ва курсунин командирвиле тестикьарна. 1990-2010-йисара Мегьамеднабиди Дагъустан Республикадин военный комиссариатда кIвалахна, ахпа ада Кьурагь, Гергебиль, Ахцегь, Рутул, Докъузпара районрин военкоматра къуллугъна.
Мегьамеднабидиз кьве велед ава. Руш Людмилади Белиждин юкьван школада къецепатан чIаларин тарсар гузва. Руслана 2005-йисуз Дербент шегьердин 19-нумрадин юкьван школа акьалтIарна ва вичин буба Мегьамеднабиди кIелай военный институт хкяна. Офицер 2010-йисуз къуллугъиз Алтайдин крайдиз ракъурна. Ина ам инженерно-саперный взводдин командирвиле тайинарна. Ахпа адакай ротадин командир хьана. 2020-йисуз ам Сириядиз ракъурна. Анай хтайла, къуллугъ давамарун патал Центральный военный округдиз (Ишим шегьер) рекье туна. Алай вахтунда ада Украинада кьиле физвай махсус серенжемда викIегьвилелди иштиракзава.
Телевиденидай хабар гайивал, капитан Агьмедова са десте аскерарни галаз военный техникадин колонна фена кIанзавай рехъ украинвийри кутунвай минайрикай михьна кIанзавай. Руслан Агьмедов къалурнавай рекьин участокдал фейила, Украинадин диверсантри рекьик минаяр кутун давамарзавай. Руслана вичиз акур гьалдикай тадиз командирдиз хабар гана. Чкадин шартIарикай менфят къачуна, аскерарни галаз женгиниз гьазур хьана. Пулеметар алай чкаяр чирна, диверсантар терг авунив эгечIна. Женг давамариз тахьана, украинвияр, яракьарни гадарна, катна.
Душманрин чIехи пай телефна. Рекьик кутунвай минаяр хкудна, Россиядин военный техникадин колоннадиз рехъ ачухна.
Капитан Р. Агьмедован дестедикай са касни телеф хьанач. Техникади саламатдиз вичин рехъ давамарна.
Агьмедоваз “Аскервилин жуьрэтлувиляй”, “Къуллугъда тафаватлу хьунай” ва Г.Жукован медалар ава. Махсус серенжемда къалурзавай викIегьвилерайни адав лайихлу шабагь агакьда.
Руслан Агьмедов пуд веледдин буба я. ЧIехи руш Миланади СтIал Сулейманан райондин ЦIийи поселокдин юкьван школада сад лагьай классда кIелзава.
Масуб Магьмудов
