23-апрелдиз СтIал Сулейманан райондин Вини СтIалрин юкьван мектебда “Илимдиз кам” лишандик кваз математикадай гьар йисуз кьиле тухун хъсан адетдиз элкъвенвай олимпиадада 5-11-классра кIелзавай аялри чпин чирвилер нубатдин, гила 15-сеферда, ахтармишна. Макьсад мектебда кIелзавай аялрин чирвилерин ери ахтармишун, математикадал рикI алай аялар майдандиз акъу­дун, абур руьгьламишун, математикадин илимдихъ итиж артухарун тир и серенжемда цIи СтIал Сулейманан, Ахцегь, Кьурагь, Дахадаев, Дербент, Новолак районрай ва Махачкъала, Каспийск, Дагъустандин Огни, Къизляр, Дербент шегьеррай тир 290-дав агакьна аялри иштиракна…

РикIел хкин, технический илимрин доктор, профессор, М.В.Ломоносован тIварунихъ галай МГУ-дин механикадинни математикадин факультет акьалтIар­навай  Абдул Баламирзоеван къаюмвилик кваз кьиле физвай олимпиададин теш­киллувилин кIвалахда кьилин категориядин муаллим, винидихъ тIвар кьунвай вуз акьалтIарнавай Гьабибула Гьабибулаевани куьмекар гузва. Спонсорар, эхиримжи са шумуд йисуз хьиз, И.Яралиеван мергьяматлувилин “Умуд” фонд, гьакIни мергьяматлувилин “Иман” фонд, Дагъустандин гуманитарный институт, гуманитарный педколледж, “ИнтехСОФТ” ООО, карчи Малик Гьажимурадов ва Вини СтIалрин юкьван мектебдин директор Расул Къагьриманов тир. Олимпиада­ тешкилунин ва кьиле тухунин кIвалах­да СтIал Сулейманан райондин администрацияди ва образованидин управленидини (РУО) еке куьмекар гузва. Алатай йисара хьиз, цIини олимпиада ачухунин мярекатда иштиракай Нариман Абдулмуталибова, кьиле тухузвай серенжемдин важиблувал къейд авунихъ галаз сад хьиз, Абдул Баламирзоеваз сагърай лагьана, проект гележегдани давамарун ва вилик тухун патал администрацияди алакьдай вири куьмекар гудайдахъ инанмишарна.

Гъалиб хьайи аялрив шабагьар вах­ку­дай шад мярекатдал райондин обра­зо­ва­нидин управленидин начальник Гьуьсейн Шихбабаева, РУО-дин патай жавабдар кас Азим Азимова ва гзаф ма­сабуру иштиракна. ИкI, гъалиб хьайи аял­рин кьадар­ 90-далай алатнавай. Абур Дербент, Махачкъала шегьеррай ва СтIал Сулейманан райондай тир. Аялрив­ талукь дережа­дин дипломар ва ­пулдин пишкешар (1-чка — 2500, 2-чка — 2000, 3-чка 1500 манат), та­фаватлу хьайи са шумудавни грамота­яр ва са агъ­зур манатдин кьадарда аваз пулдин пишкешар вахкана. “ИнтехСОФТ” ООО-дин патай махсус пишкешдиз ва 5 агъзур ма­натдин кьадарда аваз сертификатдиз ЦIийи хуьруьн мектебдин 10-класс­дин ученик Шамиль Тагьиров ла­йихлу хьа­на. Шабагьар­ гайибурун арада аялар олимпиададиз гьа­зурай муаллимарни авай. Абуруз Да­гъустан­дин гуманитарный институтдин па­тай 3 агъзур манатдин сертификатар гана.

Рагнеда Рамалданова