Махсус серенжемдикай
26-апрелдиз Кремлда РФ-дин Президент Владимир Путин ООН-дин генеральный секретарь Антониу Гутеррешахъ галаз гуьруьшмиш хьана. Президентди къейдна хьи, ООН-дин бине кутур уьлквейрикай сад тир Россияди и тешкилатдин тереф гьамиша хвена ва гележегдани хуьда.
Гуьруьшдал В.Путина Киевдин гьерекатар ИГ-дин (Россияда къадагъа авунвай тешкилат) боевикрин амалрив гекъигна. Идакай “Новости” РИА-ди хабар гузва.
“Чаз “Азовсталь” заводда ислягь агьалияр ава лугьудай ванер къвезва, акI ятIа, абур Украинадин аскерри ахъай хъувун герек я, тахьайтIа, абур террористрив гекъигиз жеда…”, — малумарна В.Путина.
Уьлкведин регьберди ислягь агьалияр чан алай къалхандин еринда ишлемишун тахсиркарвал тирди лагьана.
“Куьне Россиядин гуманитарный дегьлизри кIвалахзавач лугьузва, жанаби генеральный секретарь, куьн ягъалмишвиле тунва. Гуманитарный дегьлизар кардик ква. Чи куьмек себеб яз, Мариуполдай 130-140 агъзур кас экъечIна, абурувай чпиз кIани чкадиз хъфиз жеда. Бязибуруз Россиядиз физ кIанзава, садбуруз — Украинадиз. Гьиниз кIандатIани фирай, чна абур кьазвач, алакьдай вири жуьредин куьмекар гузва”, — лагьана Президент В.Путина А.Гутеррешаз.
21-февралдиз кьабулай къарардикай рахадайла, В.Путина тикрар хъувуна хьи, Киевди чкадин халкь тергунин гьерекатар акъвазарун патал ДНР-дин ва ЛНР-дин аслу туширвал гьисаба кьуниз Россия мажбур хьана. И кар Киевди Минскдин икьрарар кьилиз акъудуникай кьил къакъудайдалай кьулухъ арадал атана. Алава хъувурвал, ДНР-динни ЛНР-дин агьалийри алатай йисара чIугур азабриз, гьайиф хьи, РагъакIидай патан гьукумдарри дикъет тагун хъсан яз гьисабна.
ООН-дин генсекдихъ галаз хьайи гуьруьшдин нетижайрин пресс-конференциядал РФ-дин къецепатан крарин министр С.Лаврова къейд авурвал, НАТО-дин сергьятар кьадар авачир кьван гегьеншарунин нетижада Украинада къизгъин гьалар арадал атана.
“Украинадин, ДНР-дин, ЛНР-дин гьалар накьни къе арадал атанвайбур туш”, — лагьана министрди.
Къейд ийин, 27-апрелдин экуьнахъ РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 141 самолет ва 110 вертолет, зенитный ракетайрин 273 комплекс, пилот галачиз лув гудай 607 аппарат, 2596 танк ва дяведин маса машинар, РСЗО-дин 296 установка, артиллериядин ва маса 1134 яракь, дяведин суьрсет, военный махсус 2413 автомобиль тергна.
Яракьар ракъурунин акъажунар
РФ-дин МИД-дин векил М.Захаровади “Россия 1” телеканалдин эфирда малумарайвал, РагъакIидай пата, на лугьуди, Украинадиз ни гзаф яракьар ракъурдатIа тайинарун патал акъажунар тухузва, гьа са вахтунда абуру чеб ислягьвилин терефдал ала, женгерин гьерекатар акъазарна кIанда лугьузва. Ибур, адан фикирдалди, сада-садаз аксивалзавай гьерекатар я.
“ТАСС” чешмеди хабар гайивал, мукьвара Великобританияди Украинадиз вини дережадин технологиядин Brimstone классдин ракетаяр ракъурдайвал я. Идан гьакъиндай Великобританиядин оборонадин министрдин заместитель Ж.Хиппиди малумарна.
Донецкдин район яна
26-апрелдиз Украинадин кьушунри Донецкдин Петровский райондиз цIай гана. Идакай “Новости” РИА-ди хабар гана.
Донецкдин Петровский район ДНР-дин меркездин рагъакIидай патан къерехда ава. 2014-йисалай, ДНР-ди Киевдилай аслу туширвал малумарайла, и район мукьвал-мукьвал Украинадин кьушунрин гуьлледик акатна.
Къецепата сиягьатдач
Украинада арадал атанвай агьвалатар себеб яз, Россиядин туристри къецепатан уьлквейра ял ягъуникай са артух фикир хъийизмач. “RATA-News” чешмедин делилралди, майдин суварин йикъара цIи къецепатан уьлквейриз сиягьатдиз фидай россиявийрин кьадар, 2019-йисав гекъигайла, хейлин тIимил хьанва. Кьилди къачуртIа, 2022-йисуз ОАЭ-диз фидайбурун кьадар вад-ругуд сеферда тIимил хьанва, Туьркиядиз фидайбурун кьадар — ирид сеферда, Европадин уьлквейриз фидайбурун кьадар - виш сеферда. Гьа са вахтунда цIи, коронавирусдин тIугъвал пайда жедалди виликан девирдив гекъигайла, Россиядин жуьреба-жуьре чкайра сиягьатун патал путевкаяр къачунвайбурун кьадар 2,5 сеферда гзаф хьанва.
Чалпачух твада
Австралиядин энергетикадин министр Гевесслера къейд авурвал, уьлкведиз Россиядин газ, гьа виликдай хьиз, атIунар авачиз агакьзава. Идакай “Новости” РИА-ди хабар гузва.
Эхиримжи йикъара бязи уьлквейри чпиз Россиядин газ герек авачирдакай малумарнай. Месела, сифте яз РФ-дин газ акъвазарда лагьай уьлкве Польша я. Гила Болгариядини адалай “чешне” къачунва. Экспертри къейдзавайвал, и гьерекатри Европадин мулкара газдин къимет хкаж хьунин чалпачух твада.
«Лезги газет»
