22-25-апрелдиз Дагъустандин мусурманрин уьмуьрда лишанлу вакъиа кьиле фена: и йикъара Мегьарамдхуьруьн райондин Ярагъ-Къазмайрин хуьруьн жуьмя-мискIинда, Мугьаммад пайгъамбардилай (къуй Аллагьдин патай салават ва саламар хьурай вичиз) агакьнавай ядагарар яз, багьаз хуьзвай затIарин (реликвии) выставка кьиле фена.
Пуд юкъуз Ярагъ-Къазмайрин мискIин Исламдин халис центрадиз элкъвенвай. Ядигарар яз хуьзвай затIариз килигиз, иниз неинки са Дагъустандин шегьеррайни районрай, гьакIни уьлкведин маса регионрай, гьатта къецепатан уьлквейрайни инсанар атанвай.
Выставкада эцигнавай затIарин арада Пайгъамбардин (къуй Аллагьдин патай салават ва саламар хьурай вичиз) гапур, бади, Билал асгьабдин гичин, Абу Бакр халифадин гапур, Кябедин дапIарни куьлег, Халид асгьабдин яд цадай къаб ва маса шейэр авай. И ядигарри пуд йикъан къене мусурманар сад авуна.
«Лезги газет»
