23-апрелдиз Каспийскда, “Анжи Арена” стадиондин майдандал, республикадин дережада аваз тешкилнавай ифтар (сив хкудуниз талукьарнавай мярекат) кьиле фена. “Лезги газетдиз” РД-дин Муфтиятдин пресс-къуллугъди хабар гузвайвал, ана 20 агъзурдав агакьна­ инсанри иштиракна. Мярекатдин гьуьр­метлу мугьманрин арада Дагъустандин Кьил Сергей Меликов, РД-дин Государстводин секретарь Мегьамед-Султан Ме­гьамедов, РД-дин муфтий Агьмад Афанди, Каспийск шегьердин мэр Борис Гонцов, Татарстандин муфтий Камил-хазрат Самигуллин, Кировский областдин муфтий Зуфар Галиуллин, Став­рополдин крайдин муфтийдин меслятчи, чи газетдин амадаг Шагьпаз Асаханов, Чечен Республикадин муфтийдин куьмекчи Арсланали Шагьбулатов, КЧР-дин муфтийдин заместитель Мугьаммад Эркенов ва масабур авай.

Диндин межлис Йемендай тир хафиз Ибрагьим Агьмад аз-Зубаджиди Къуръандин аятар кIелунилай гатIунна. Гуьгъуьнлай мярекатдин сергьятра аваз рахайбуру ифтардин иштиракчийриз рамазандин варз мубаракна, адан кьетIен­ви­лер къейдна, сив хуьнихъ авай метлебдикай ихтилатарна.

Вичин рахунра РД-дин Кьил Сергей Меликова алай вахтунда Украинадин мулкарал кьиле физвай махсус операцияда иштиракзавай дагъустанвияр ри­кIел гъана, абурун кьегьалвилерикай ла­гьана, кьилел ислягь цав, уьлкведа ха­­тасузвал хьун патал чанар къурбанд авунвай игитрин экуь къаматриз бахшна дуьа авуниз эвер гана. “Мумкинвиликай менфят къачуна заз телеф хьанвай чи ватандашрин мукьва-кьилийриз мад сеферда башсагълугъвал гуз кIанзава. И чилел уьмуьр давамарзавайбурухъ чандин сагъвал хьун патал ша чна вири­да дуьа ийин”, — элкъвена Сергей Меликов мярекатдин иштиракчийрихъ.

Республикадин муфтий Агьмад Афандиди ифтарри мусурманар садзавайди къейдна. “Эхиримжи йисара тIугъ­вал себеб яз чун ихьтин мумкинвиликай магьрум хьанвай. Къе чаз санал кIватI жедай рекьер ачухунай чна Аллагьдиз шукур гъана кIанда”, — лагьана ада.

Диндин межлис жуьреба-жуьре дес­тейри тамамарай нашидри, къалурай сегьнейри мадни гурлу авуна. Эхирдай вирида санал сивер хкудна, капI авуна.

Агьмед Магьмудов