Къенин чи ихтилат медицинадин илимрин доктор, профессор, Ростовдин ГМУ-дин педиатриядин ва пешекаррин дережа хкаждай факультетдин кафедрадин заведующий Летифов Гьажи Муталибовичакай я.
Гь.Летифов 1948-йисуз Ахцегь райондин Мацарин хуьре дидедиз хьана. 1976-йисуз ада Ростовдин госмединститут тафаватлудаказ куьтягьна. Кьилин образование къачур, гегьенш чирвилер авай жегьилди 1977-1980-йисара Ростов шегьердин 4-нумрадин азарханадин аялрин нефрологиядин отделенида духтурвал авуна.
Вичин вилик илимдин кукlушрихъ хкаж хьунин макьсад эцигнавай жегьилди 1983-йисуз аялрин азаррин рекьяй аспирантура куьтягьна.
1987-йисалай Гьажи духтур винидихъ тlвар кьунвай азарханада аялрин азаррин кафедрадин ассистент ва 2003-йисалай доцент хьана. 2005-2012-йисара ада Ростовдин ГМУ-дин педиатриядин ва пешекаррин дережа хкаждай ва чирвилер артухардай факультетдин кафедрадин профессорвал авуна, 2012-йисалай и кафедрадин заведующий хьана.
Ада “Роль неспецифических факторов защиты организма в патогенезе пиелонефрита у детей” темадай медицинадин илимрин кандидатвилин, “Роль сенсибилизации к эндотоксинам грамотрицательных бактерий в патогенезе пиелонефрита у детей. (Клинико-экспериментальное исследование)” темадай докторвилин диссертацияр хвенва.
Тlвар-ван авай чи ватанэгьли 200-далай гзаф илимдинни методикадин кlвалахрин автор я. Гьажи Муталибовича илимдин рекье этиологиядиз, патогенездиз ва терапиядиз итиж ийизва. Ам вини дережадин чирвилер авай нефролог хьиз машгьур я. Кьилин категориядин духтур Гь.Летифов Ростовдин ГМУ-дин координационный советдин, Россиядин аялрин нефрологрин тешкилатдин президиумдин, Ростовдин областдин нефрологрин кlватlалдин ва маса тешкилатрин член я.
Гьажи духтурдикай Интернетдин сайтда ихьтин келимаяр кхьизва:
“Хъсан духтур я. Кьве сеферда адан кьилив фена. Рикlивай эгечlзавай пешекар яз акурла, адахъ инанмиш хьун за хъсан яз гьисабна. И регьимлу инсандиз за гзаф сагърай лугьузва”.
“Камаллу духтур я. Накь аял гваз адан кьилив фенай. Галай-галайвал гъавурдик кутуна. Инанмиш я, адан теклифри чаз еке куьмек гуда”, — кхьизва са дишегьлиди.
Гьажи Муталибовича Ростовда кьиле физвай лезгийрин мярекатрани иштиракзава. Ростовда яшамиш жезвай чи дуст Вагьид Адилова Гьажи духтурдин гьакъиндай ингье вуч лугьузватIа: “Алатай йисуз Ростовда авай лезгийри Яран сувариз талукь яз тешкилай мярекатдал заз Гьажи Муталибовахъ галаз таниш жедай мумкинвал хьана. Адан ватанпересвилин ихтилатри чун гьейранарна. Гзаф къени, ватанперес, халкьперес инсан я”.
Къуй чи ватанэгьли мадни чlехи дережайрив агакьрай!
Гьазурайди — Куругъли Къалажухви
