Садра Мугьаммад Пайгъамбардин (с.а.с.) патав кесиб итим атана. Ада Пайгъамбардиз (с.а.с.) савкьат яз са къапуна авай ципицIар гъанвай. Пайгъамбарди (с.а.с.) савкьат кьабулна ва къапунай ципицIдин са твар къачуна, тIуьрдалай гуьгъуьниз ада хъверна. Ахпа ада мадни са шумуд ципицI къачуна. И кар авур гьар сеферда ада хъвер ийиз хьана. Гьа са вахтунда а ципицIар гъайи итим шадвиляй цаварив агакьиз гьазур тир.
Гьа и арада асгьабар паталай килигиз акъвазнавай. Абур тажуб хьана амукьнавай, гьикI хьи, Аллагьдин Векилди (с.а.с.) вичиз гъайи няметар гьамиша абурухъ галаз пайдайди тир, и сеферда лагьайтIа, ада ихьтин кар авунач… Мугьаммад Пайгъамбарди (с.а.с.) вири ципицIар вичи тIуьрдалай гуьгъуьниз къаб савкьат гваз атай итимдив вахкана. А итимни чина еке шадвилин нур аваз хъфена.
Гьа и арада асгьабрикай сада хабар кьуна:
“Я Аллагьдин векил, вав агакьай нямет вуна чахъ галаз вучиз пайнач?”
Пайгъамбарди (с.а.с.), хъверна хьиз, жаваб хгана:
“Квез ам гьикьван шад хьанвайтIа акуначни? За ципицIар дадмишайла, абур цурубур яз хьана. Гьавиляй за абур квез теклифнач. Теклифай чIавуз квекай сада абур цурубур тирдакай лагьанайтIа, а ципицIар заз савкьат яз гъайи итимди дарихвалдай. Гьа и кардикай заз игьтиятни авай”.
«Лезги газет»
