Са шумуд югъ идалай вилик Рязанда джиу-джитсудай Россиядин Кубок патал гьам итимрин, гьамни дишегьлийрин арада акъажунар кьиле фена. Турнирдиз уьлкведин 30-далай виниз регионрай 900-дав агакьна спортсменар кIватI хьанвай. Ана вичин ери-бине Ахцегь райондин КьакIарин хуьряй тир, эхиримжи 10 йисуз Москвада яшамиш жезвай Ибрагьим Исмаилова неинки уьлкведин Кубок, гьакIни джиу-джитсудай спортдин мастервилин тIварни къазанмишна. Аферин!
РикIел хкин. И.Исмаилова Россиядин чемпионатра кьве сеферда гъалибвал къазанмишна. 22 йисан яшда аваз Россияда джиу-джитсудай чIулав чIул къазанмишнавайбурукай ам виридалайни жегьилди я.
— Турнир вини дережада аваз кьиле фена. Жуьреба-жуьре регионрай атанвай спортсменрин арада машгьурбурни гзаф авай. За 4 бягьс кьиле тухвана. Сад лагьайда заз Чечнядай тир спортсмендихъ галаз къуватар ахтармишун кьисмет хьана. Бягьс 9:0 гьисабдалди эхирдал къвезвайла, ам гъилин кьуьнтез тIарвал гудай къайда ишлемишуналди акьалтIарна. Кьвед лагьай бягьс, ам Рязандай тир спортсмендихъ галаз кьиле фена, 14:0 гьисабдалди, бамишардай къайдадикай менфят къачуналди акьалтIарна. 3-бягьс зун патал виридалайни четинди хьана лагьайтIа жеда,- суьгьбетзава И.Исмаилова.
Малум хьайивал, 3-бягьсина Ибрагьима Москвадай тир, алай йисуз Россиядин чемпионвилин тIвар къазанмишнавай Дмитрий Тимофеевахъ галаз къуватар ахтармишна кIанзавай. Кьве йис вилик абур Москвадин чемпионатда “гуьруьшмиш” хьайиди тир. А чIавуз гъалибвал Ибрагьима къазанмишнай. Гила, гьелбетда, москвавидиз кьисас вахчудай ният авай. Югъ нисинилай алатнавай, инанмишвилелди кьиле тухвай кьве бягьс кьулухъ галамай. Рамазандин варз яз, Ибрагьима сив хуьзвай… Чи ватанэгьлиди Дмитрияхъ галаз бягьсина акьван хъсан ва дуьм-дуьздаказ вичин стратегия хкянавай хьи, четин хьана, амма гъалибвал къазанмишна. Финалдани Ибрагьима вичин къуватар Москвадай тир спортсмендихъ галаз ахтармишна — бягьс 2:0 гьисабдалди акьалтIна.
Гила И.Исмаилов дуьньядин чемпионатдиз гьазурвилер акунив эгечIда.
Рагнеда Рамалданова
