Алатай гьафтеда Крым республикадин Алушта шегьерда гиряяр хкажунай Россиядин ЮФО-дин ва СКФО-дин чемпионат кьиле фена. СтIал Сулейманан райондин администрациядин пресс-къуллугъди хабар гузвайвал, РД-дин хкянавай командадик кваз ана муниципалитетдин спортдин, туризмдин ва жигьилрин крарин рекьяй комитетди республикадин гиряйрин спортдин Федерациядихъ галаз санал рекье тунвай са шумуд спортсмендини иштиракна ва хъсан нетижаяр къазанмишна.
ИкI, Дагъустандин гиряяр хкажунин спортдин тарихда сад лагьай сефер яз, тренерар тир Магелан Саидован ва Рустам Жабраилован гъилик вердишвилер къачузвай Эдик Агьмедовалай (85 кг-дал къведалди заланвал авайбурун арада) Россиядин Кьиблепатан ва Кеферпатан Кавказдин чемпионвилин тIвар къазанмишиз алакьна. 73 кг-дал къведалди заланвал авайбурун арада Азим Абакарова 2-чка кьуна. Самрат Мирзоев (68 кг-дал къведалди заланвал авайбурун арада) буьруьнждин медалдиз лайихлу хьана.
Къейд авун лазим я хьи, Ислам Агъабеговакай, Самрат Мирзоевакай, Азим Абакаровакай ва Эдик Агьмедовакай ибарат тир Дагъустандин хкянавай командади ЮФО-дин ва СКФО-дин командайрин арада эстафетадай 3-чкани кьуна.
Рагнеда Рамалданова
