Къенин чи суьгьбет Рауф Тагьирович Эмиржановакай я. Ам 1915-йисуз Ахцегьрин хуьре дидедиз хьана. Юкьван школа ада Баку шегьерда акьалтIарна. Ина адан бубади нафтIадин буругърал кIвалахзавай. Школа куьтягьайдалай кьулухъ Р.Эмиржанов Бакудин М.Азизбегован тIварунихъ галай нафтIадинни химиядин институтдик экечIна. Ам 1939-йисуз яру дипломдалди куьтягьна, институтдин кафедрада кIвалахал тайинарна.
1941-йисан июндиз Рауф Тагьировича химиядин илимрин кандидатвилин диссертация агалкьунралди хвена. Са тIимил йикъарилай Ватандин ЧIехи дяве башламишна ва Р.Эмиржановаз лейтенантдин чинда аваз кардик квай армиядин жергейриз эверна. Ина ада кьилдин 43-бригададин взводдиз регьбервал гузвай. Къати женгера Р.Эмиржановал залан хер хьана. 1945-йисуз ам кафедрада мад илимдинни педагогвилин кIвалахдив эхгечIна.
Ватандин ЧIехи дяведа Рауф Тагьировичан иштираквал, гьакIни адан гьакъисагъ зегьмет гьукуматдин са жерге шабагьралди къейднава. 1944-йисуз Р.Эмиржанов КПСС-дин жергейриз кьабулна. Алимвилин тIвар ада 1948-йисуз къачуна. Рауф Тагьирович илимдин са жерге кIвалахрин автор я. Абуруз гьам къенепатан ва гьамни къецепатан уьлквейрин инженерри, нафт гьялзавайбуру еке къимет гана. Инженериядиз ва нафт гьялунин рекьяй аппаратриз талукь яз ада чапдай акъудай кIватIалар вири дуьньядиз гегьеншдиз машгьур я. Абур гьакI азербайжан ва ингилис чIаларал таржума авунва.
Къейд ийин, педагогвилин яргъал девирда 1957-йисалай 1963-йисал къведалди Рауф Тагьировича еке агалкьунар аваз Бакудин Азизбегован тIварунихъ галай нафтIадин ва химиядин институтдин (гилан Азербайжандин нафтIадин академия) химико-технологический факультетдин деканвиле зегьмет чIугуна. Ам са шумуд сеферда къейднавай факультетдин парторганизациядин секретарвиле, гьакIни вуздин парткомдин членвиле хкяна. Бажарагълу педагог — ахтармишдайди, вичин илимдин кIвалахар химиядин технологийра гегьеншдиз ишлемишиз хьайи Рауф Тагьировичахъ лайихлу гьуьрмет ва кесерлувал авай.
Бакуда арадал атай вакъиайрихъ галаз алакъалу яз Рауф Тагьирович 1996-йисуз Ставрополдин крайдин Невинномысск шегьердиз куьч хьана. Ина ада, агьил яшаризни килиг тавуна, илимдин кIвалах давамарзавай. Алим 2011-йисуз рагьметдиз фена.
Нариман Мамедов
