1986-йис тир. Зун Къазахстандин ЦIийи Узень шегьердай чирвилер хкажун патал Москвадин областдин Домодедово шегьерда авай МВД-дин институтдиз ракъурнавай. Лугьузвайвал, ам, арадиз гъана, кIвалахдик кутурди лезги хва, цмурви генерал Гь.Шайдаев тир.
Зун иниз атайла, ада кIвалах хъийизмачир. Ам цIийиз тайинарнавай МВД-дин министр Федорчука маса чкадиз кIвалахал рекье тунвай. Институтдин офицерри, преподавателри генерал-майор Гь. Шайдаеван тариф ийидай, ам хушвилелди рикIел хкидай. Ихьтин ихтилатар ван хьайила, заз гзаф шад жедай ва чи курсуна кIелзавай курсантриз чун са райондай я, ам зи ватанэгьли я лугьудай. Ахьтин инсанар чи халкьдин арадай гьикьван гзаф акъатайтIа, гьакьван хъсан жеда.
Чи курсунин начальник са подполковник тир. Чун жергеда акъвазнавай вахтунда ада “Дагъустандай курсантар авани?” лагьана хабар кьуна. За лагьана зун дагъустанви я, амма иниз Къазахстандай атанва. Ада заз тарсарилай кьулухъ вичин кабинетдиз атун теклифна. Кабинетдиз фейила, ада зун лап хъсандиз кьабулна. Авур ихтилатрай зун гъавурда гьатна хьи, подполковникдин бубани диде дяведин вахтунда таниш ва чеб чпиз хуш хьана. Ахпа мехъерарна. Абур Москвада яшамиш жезвай. Подполковникдин диде, фамилия зи рикIел аламач, лезги тир, гьамни чи СтIал Сулейманан райондай.
Курсунин начальник яз, ада иниз атай дагъустанвийриз вичивай жедай куьмекардай, хъсанвилер ийизвай. Институт элкъуьрна къванцин парудалди кIевнавай. Контрольно-пропускной пунктунай, институтдин чIехибурун ихтияр авачиз, экъечIдай ихтияр авайди тушир. Подполковникди чибуруз, яни дагъустанвийриз, герек хьайила, шегьердиз фидай мумкинвал гудай.
Фагьумайла, гьа подполковникдин диде хьтин викIегь лезги рушар Ватан хуьн патал тIимил фенач дяведиз. Гьахьтинбурукай сад Къурбанова Тамара Небиевнани тир.
Дяве башламиш жедалди вилик рухунви Къурбанов Небиди Азербайжанда нафтIадин буругъра кIвалахзавай, руш Тамаради — деталар цIалцIамардай заводда. 1941-йисуз фашистрин Германияди хабарсуз чи Ватандал вагьшивилелди гьужумна. Хайи Ватан хуьн патал фронтдиз гуьгьуьллувилелди жегьил рушарни физ хьана. Гьа и йисуз са десте рушар (абурун арада Тамара Небиевнани авай) радистар гьазурдай курсариз фена. 6 вацран курсар куьтягьайла рушар къизгъин женгер кьиле физвай чкайриз ракъурна.
Тамара Къурбановади вичин везифаяр дирибашвилелди тамамарна, душмандикай хайи Ватан, Европадин уьлквеяр азад авуник, Берлин къачуник вичин пай кутуна. Дяведин вахтунда ада вич игит хьиз къалурна. Адаз “Кавказ хуьнай” ва “Германиядал гъалиб хьунай” медалар гана.
Фронтдай хтайла, ада са кьадар йисара Кьасумхуьруьн райондин Ичинрин сифтегьан школада муаллимвиле кIвалахна. 1966-йисуз залзала хьайила, ам ЦIийи Макьарин хуьруьз эвичIна ва адакай хуьруьн юкьван школада гъвечIи классра кIелзавай аялриз тарсар гудай муаллим хьана.
Акьалтзавай несилдиз хъсан чирвилер ва тербия гуз, гьакъисагъвилелди, баркаллувилелди зегьмет чIугур Тамара Небиевнадиз В.И.Ленинан 100 йисан юбилейдин медаль гана.
Тамара Небиевна чи арада амач. Хуьруьнвийрин рикIел ам хъсан инсан, аялриз дерин чирвилер гайи муаллим яз алама. Рагьмет хьурай вичиз.
Масуб Магьмудов
