Дагъустандин кьиблепата промышленностдинни производстводин жуьредин экономикадин кьетIен мулк (ОЭЗ) туькIуьрун пландик кутунва. И месэла РД-дин экономикадин ва мулкар вилик тухунин министерствода и йикъара кьиле фейи совещанидал веревирдна.
РД-дин Кьил Сергей Меликован тапшуругъдалди РД-дин экономикадин ва мулкар вилик тухунин министерстводи республикадин муниципальный тешкилатрихъ галаз санал мумкин тир инвесторар жагъурунин ва Дагъустандин кьиблепата арадал гъизвай промышленностдинни производстводин жуьредин экономикадин кьетIен мулкуниз талукь инвестпроектрин сиягь туькIуьрунин кIвалах кьиле тухузва.
ОЭЗ-дин инвестпроектрин сифтегьан, яни тамам тушир сиягьда къенин юкъуз асул кьуд проект ава: Докъузпара райондин Авадан хуьре санлай маса къачудай ва логистикадин центр ва Мегьарамдхуьруьн райондин Ярагъ-Къазмайрин, Тагьирхуьруьн-Къазмайрин ва ЦIийи Филерин хуьрера таможнядинни логистикадин центраяр ачухун.
ОЭЗ-дин резидент жедай ихтияр анжах капитальный харжийрин кьадар 120 миллиондилай тIимил тушир ва абурукай 40 миллиондилай тIимил тушиз икьрар кутIунай йикъалай кьулухъ 3 йисан вахтунда серфун лазим тир алишверишдин тешкилатдиз ава.
ОЭЗ арадал гъун патал инвестицийрин санлай къачур кьадар 8 миллиард манатдин дережада аваз тайинарнава, инвестпроектар лагьайтIа, агъа кIан 5 хьун лазим я.
Промышленностдинни производстводин экономикадин кьетIен мулкунин майдан 4000 гектардилай артух хьун лазим туш. Адан сергьятда авай чилер лагьайтIа, махсус тайинвал авай ва я хуьрерин чилерин дережадинбур хьана кIанда.
«Лезги газет»
