ТиртIа жувни шаир…

 

Эгер тиртIа жувни шаир,

Яраб за вуч ийидай?!

За шаиррин фикиррикай

Поэмаяр кхьидай!

 

Эгер тиртIа жувни шаир,

Лекь хьиз, цавуз экъечIдай.

Анай жуваз акур-такур:

Шиир кхьиз эгечIдай.

 

Яраб за вуч ийидайтIа,

Халкьдин шаир хьанайтIа?!

Сад Аллагьди багъишна заз,

Ахьтин камал ганайтIа?

 

Валлагь, дустар, къекъведай зун,

Майрудин хьиз, дугъри яз…

Къекъведачир зун дуьньяда,

Шииратдин угъри яз!

«Лезги газетдин» 2022-йисан 15-нумрадай