29-апрелдиз Мегьарамдхуьруьн райондин Вини Ярагъ хуьре тlвар-ван авай алим, шейх Мегьамед Ярагъви рикlел хкуниз талукьарнавай форум кьиле фена.
Мярекатда РД-дин Муфтийдин заместитель Агьмад Кахаева, Кьиблепатан территориальный округда Муфтиятдин марифатдин отделдин регьбер Шамиль Омарова, РД-дин физический культурадин ва спортдин рекьяй министрдин заместитель, олимпийский чемпион Гьайдарбег Гьайдарбегова, Дербент районда марифатдин отделдин регьбер Къурбан Рамазанова, Мегьарамдхуьруьн райондин имам Агьмад Мегьамедова, Гуниб райондин Согъратл хуьруьн кьил Мегьамед Гьажиомаров, ННТ телеканалдин кьилин редактор Ханжан Къурбанов ва хейлин хуьрерай атанвай дестейри иштиракна.
Мярекатдин иштиракчийри чlехи шейхинин уьмуьрдикай, жуван ата-бубайрин тарих чирунин, миллетдилай тафаватлу тушиз, вири дагъустанвийрин арада стхавални садвал мягькемарунин важиблувиликай ихтилатна.
Агьмад Кахаева вичин рахунар кlватl хьанвайбуруз Дагъустандин Муфтий, шейх Агьмад Афандидин патай тебрикдин гафар лугьунилай гатlунна. Ада чи республикадиз Мегьамед Ярагъви хьтин зурба шейх кьисмет авунай Аллагьдилай разивал авуна. Ада къейд авурвал, шейх Мегьамед Ярагъви чун патал уьмуьр гьикl кьиле тухунин хъсан чешне я.
Эхирдай Муфтийдин заместителди Пайгъамбардин (Аллагь рази хьурай вичелай) юлдашриз ва машгьур динэгьли Мегьамед Ярагъвидиз талукь яз 5-майдиз Дербент шегьердин тарихдин жуьмя мискlинда кьиле фидай Республикадин алимрин межлисдикай ихтилатна. Ада виридаз и межлисда иштиракуниз эверна.
«Лезги газет»
