2021-йисуз, коронавирус акатна, азарханада хьайидакай за кхьенай. ЦIинин йисуз и завал зал мад расалмиш хъхьана… ИкI, кефи чIур хьана, “Тади куьмекдиз” эверайла, тест авуна, дарманар кхьена, хъфена. Амма идалди куьтягь хьанач. “Тади куьмекдиз” мад сеферда эверуниз мажбур хьайи зун и гъилера Махачкъалада, Мегьамед Гьажиеван куьчеда, авай госпиталдиз тухвана.
Ахтармишайла, зи жигерриз 15 % зиян ганвайди дуьздал акъатна. Чи палатадин духтур жегьил дишегьли Жамиля Абасовна тир. Ам вичин вахтунда чкадал жедай, палатада авайбурувай гьал гьикI ятIа жузадай ва лазим тир серенжемар кьабулдай. Медсестрайрини чпин везифаяр намуслудаказ кьилиз акъудзавай: вахт-вахтунда системаяр кутазвай, рапар язавай, дарманар гузвай. Чухсагъул госпиталдин вири коллективдиз, гьа жергедай яз 205-палатадин духтур Жамиля Абасовнадиз, Мадинадиз ва амай медсестрайриз.
Заз лугьуз кIанзава, шазандалай цIи, сагъар хъувунал гьалтайла, хъсан патахъ хейлин дегишвилер хьанвай. Госпиталда зун рапар ягъуналди сагъариз башламишна, ахпа системаяр, кислороддалди иви таъминардай аппарат кутуна… Инал заз сифте сеферда зун азарханадиз аватайдалай кьулухъ духтуррин тежриба аквадайвал хкаж хьанвайди, азардихъ галаз женг чIугунин цIийи къайдаяр артух хьанвайди къейд ийиз кIанзава. Сифте тIугъвал акъатайла, духтурар пара четинвилера гьатнавайтIа, гила абур хъсандиз гъавурда авайди виле акьазвай. Азарлуярни 10-12 йикъан къене сагъ хъжезвай.
Заз мадни са месэладикай лугьуз кIанзава. Пешекарри къейдзавайвал, коронавирусдикай тамамвилелди сагъ хъхьун патал варцар, гьатта зур йисалайни артух вахт герек къвезва. Гьавиляй духтуррин меслятрал амал авун лазим я. Кьилиндини, бедендин иммунитет хкажуниз артух фикир гана, чIуру хесетрикай къерех хьана кIанда.
Къуй чи сагъламвилин къаравулда акъвазнавай вири духтурриз Аллагь куьмек хьурай!
Мариян Бугаева
