Мукьвара Дагъустандин гьукуматда республикадин кьиле авай ксар Москвадин фтизиопульманологиядин НМИЦ-дин (Милли медицинадин ахтармишунардай Центр) делегациядихъ галаз гуьруьшмиш хьана. Ана РД-дин Гьукуматдин Председателдин замес­титель Мурад Къазиева, Дагъустандин здра­воохраненидин министр Татьяна Беляевади, Даггосмедуниверситетдин ректор Висампаша Ханалиева, РД-дин Халкьдин Соб­ранидин здравоохраненидин комитетдин председатель Ильяс Мамаева иштиракна. Идакай РД-дин здравоохраненидин минис­терстводин пресс-къуллугъди хабар гузва.

Малум хьайивал, алатай вацра федеральный пешекарар республикадин, кьилди къачуртIа, Махачкъаладин, Дербентдин, Буйнакскдин чахуткадин азардихъ галаз женг чIуг­вадай медидарайрин  кIвалахдихъ галаз таниш хьана. Макьсад кIвалах­дин рекьяй дагъустанви юлдашриз тешкиллувилинни методикадин рекьерай куьмекар гун тир.

Гуьруьшдал важиблу са жерге месэлаяр веревирдна. Кьилди къачуртIа, республикадин районра ва шегьерра лаборато­рияр ва рентгендин аппаратар цIийи хъувун ­ла­зим тир фикирдал атана. Дагъустандин здра­воохра­ненидин министерстводи Къизилюрт шегьер­дин чахуткадихъ галаз женг чIуг­­­ва­дай диспансердиз — диагностикадин цIийи тадаракар,  республикадин  диспансердизни санай масаниз тухуз жедай рентгендин кьве аппарат ва эндоскопиядин тадаракар ва микроскопар чара авуниз хъсан къимет гана.

Эхиримжи йисара республикада чахут­ка­дихъ галаз женг чIугвадай медидарайриз ахъай­завай дарманрин кьадар ва тIуьн артух­ хьанва. Нетижада ва вахтундамаз азар дуьз­дал акъудиз хьуни чахутка акатзавайбу­рун ва адакди рекьизвайбурун кьадар тIи­ми­лариз хьанва. Амма, федеральный экспертри къейд­ авурвал, республикада фикир хгана кIан­­завай месэлаяр, и рекьяй кьилиз акъудун лазим тир крар гзаф ама.

Чи мухбир