И йикъара чав туькьуьл хабар агакьна. 97 йисан яшда аваз Ватандин ЧIехи дяведин активный иштиракчи, гьукуматдин хейлин шабагьрин иеси, государстводин ва жемиятдин деятель, Махачкъала шегьердин гьуьрметлу агьали, баркаллу веледрин буба Мегьемет Шагь-Гьуьсейнов рагьметдиз фена.
М. Шагь-Гьуьсейнов 1925-йисан 7-июндиз Ахцегь райондин Ялцугърин хуьре лежбердин хизанда дидедиз хьана. Хуьруьн школада сифтегьан чирвилер къачунвай жегьилдиз 1943-йисуз армиядин жергейриз эвер гана. Ам Кьиблепатан Дагъустандин районрин хейлин жегьилрихъ галаз санал Бакудин противовоздушный оборонадин частуниз рекье туна. Гитлеран фашистар Бакудин нафтIадин мяденар кьунин къастунив ацIанвай. Абурун самолетар ара-ара Бакудин цава пайда жезвай. Частуна чирвилер къачур Мегьемет тади гьалда тешкилай дестейрихъ галаз фронтдиз ракъурна. Горькийдин ва Владимирдин областра тешкилнавай махсус лагерра абуруз мадни чирвилер гана. Радист хьайи Шагь-Гьуьсейнов Белоруссиядин 1-фронтдиз рекье туна.
Женгер кьиле тухузвай вири вахтунда Шагь-Гьуьсейнова радиствилин везифаяр тирвал тамамарна. Адаз Ватандин дяведин II дережадин орден, “Гьуьрметдин орден” знак, “Женгинин лайихлувилерай”, “Кавказ хуьнай” медалар гана.
Дяведилай гуьгъуьниз ялцугъви дивизиядин политотделдин начальникдин теклифдалди Фрунзедин тIварунихъ галай военно-политический училищедик экечIна. КIелунар акьалтIарайла, Мегьемет Закавказьедин военный округдиз рекье туна. Са тIимил вахтунда къуллугъна, жегьил офицер Москвадин Ленинан тIварунихъ галай военно-политический академиядик экечIна.
Академия лап хъсандиз куьтягьай Шагь-Гьуьсейнова жуьреба-жуьре частара къуллугъна, гьа жергедай яз — Германиядани. Хейлин йисара зениткайринни ракетайрин бригададин политотделдиз регьбервал гана. 1977-йисуз ам ислягь зегьметдив эгечIна. Полковник Курскдин машинар акъуддай заводдин парткомдин секретарвиле тайинарна. Кьве йисуз ана кIвалахайдалай гуьгъуьниз Дагъустандиз хтана. Махачкъала шегьердин Ленинский райондин яшайишдин кIвалерин учет тухудай ва абур чара ийидай отделдин заведующийвиле, “Дагрыбпром” объединенидин кадрийрин отделдин начальниквиле зегьмет чIугуна.
23 йисуз республикадин дяведин ва военный къуллугъдин ветеранрин комитетдиз регьебервал гана, гьа са вахтунда ам Россиядин дяведин ветеранрин комитетдин Президиумдин членни тир.
М.Шагь-Гьуьсейнован кьве хцини бубадин рехъ кьуна. Киевдин военно-инженерный ва Ленинграддин командно-артиллериядин училищеяр, ахпа вузар куьтягьай Олегни Вячеслав Россиядин армиядин офицерар я.
“Лезги газетдин” редакциядин коллективди рагьметлудан хизандиз, мукьва-кьилийриз башсагълугъвал гузва.
