Гатфарин магьсулар цун патал Дагъустандин хуьруьн майишатдин зегьметчийриз 10,4 агъзур тонн тумар лазим я. Гьелелиг республикадихъ 9,6 агъзур тонн тумар ава, хабар гузва РД-дин Россельхозцентрадин пресс-къуллугъди.
Центрадин тумчивилин отделдин делилралди, санлай къачурла, регионда гатфарин магьсулар 225 агъзур гектарда цун планламишнава. Мартдин эхирдин делилралди, и кар 33 агъзур гектарда кьилиз акъуднава.
“Гатфарин магьсулар республикада 225 агъзур гектарда цада, им лагьайтIа, алатай 2021-йисан кьадардилай 15 агъзур гектардин гзаф я. Кьилди къачуртIа, алай йисуз техил 70 агъзур гектарда (адакай 26 агъзур гектарда — прунз), майваяр — 42 агъзур гектарда, картуфар — 20 агъзур гектарда, гзаф йисарин хъчар — 26 агъзур гектарда, бахчадин майваяр (халияр, къарпузар) — 9 агъзур гектарда цадайвал я”, — хабар гузва пресс-къуллугъди.
РД-дин Россельхозцентрадин тумчивилин отделдин начальник Мурад Муртазалиеван гафаралди, алай вахтунда 6,7 агъзур тонн тумарин ерилувал ахтармишунин кIвалах тамамарнава, абурун 97 процентди еридин жигьетдай вири истемишунриз жаваб гузва.
“Къейд ийин, еридал кьетIен гуьзчивал авун иллаки важиблу я, вучиз лагьайтIа, ерисуз тумар цайила, гъилиз къведай бегьер усалди ва сагълам туширди жеда”, — лугьузва М.Муртазалиева.
«Лезги газет»
